Meghaduta p117

p117

atha mārgasthito devagiristvayopagantavyaḥ ; tadabhiyāyinaśca tavādhvaśramo'nāyāsameva gamiṣyatītyāha— tvanniṣyandetyādi | tvatkṛtanavajalāvasekaśithilitāvayavavasuṃdharāgandhasaṃsargasundaraḥ | srotorandhradhvanitasubhagaṃ ambunirgamadvārakalakalavanmanoharaninadaśrāvyam, śuṇḍākāṇḍakuharakuhūkārakolāhalatvāt | 'sroto'mbunirgamadvāra indriye'psu jalasrutau' iti vaijayantī | dantibhiriti, niśitaviṣāṇakoṭipāṭitapratikaraṭitaruviṭapagiritaṭāditvena sulabhaśramatvaṃ dhvanyate | athavā gajānāmeva dantavatvātteṣāmeva madayogācca madadoṣasaṃtaptairiti dhvanyate; tāddaśāmeva śītamārutāsvādatṛṣṇaucityāt | pīyamānaḥ puṣkarairāsvādyamānaḥ, mukhaireva vā surabhinavajalamanīṣayā; tathā śrīrāmāyaṇe— 'meghodaravinirmuktāḥ kalhārasukhaśītalāḥ | śakyamañjalibhiḥ pātuṃ vātāḥ ketakagandhinaḥ ||' iti | harṣacarite ca— 'pavanamapi pātumabhūdabhilāṣo divasakarasaṃtāpāt' iti | nīcaiḥ mandam | vāsyati vījiṣyate | upajigamiṣoḥ samīpe gantumicchoḥ | anena devagireḥ sāmīpyāttadīyo vāyuriti sidhyati | devapūrve girimiti | 'daśāpūrvarathaṃ yamākhyayā' 'hiraṇyapūrve kaśipuṃ pracakṣate' ityādivaddevapūrvagiriśabdābhidhānaṃ parvatamiti jhaṭiti pratīteḥ; śabdaparatvārthaparatvādivikalpasyānavakāśaḥ, śābde vyavahāre nirvyabhicārārthapratītereva prayojakatvāt; lakṣaṇe'pyaprayuktasyāprayojyatayā lakṣaṇato mahākaviprayogasya prābalyācca | śītaḥ tvanniṣyandetyanenaiva śaityahetoḥ prasaṅgāt | pariṇamayitā pariṇāmajanakaḥ | kānanodumbarāṇāṃ vanagatayajñāṅgataruphalānām | 'kartṛkarmaṇoḥ kṛtiḥ' iti karmaṇi ṣaṣṭhī | anena pariṇatodumbaraphalaśa-