Meghaduta p124

p124

atha bhagavataḥ skandasya prasādanaṃ bandhukāryaṃ caitena karmaṇā saṃpādyamityāha—jyotirlekheti | vartulākāratejorekhāviśiṣṭamiti manoharatvātiśaya uktaḥ | galitaṃ na tu khaṇḍitam, svayameva kālato bhraṣṭam | anena tadviṣaye sadayatvaṃ dhvanyate; 'nādatte priyamaṇḍanāpi bhavatāṃ snehena yā pallavam' itivat | barhaṃ bhavānīti | iyaṃ parameśvaraprāṇeśvarī, tattu vanecaravanitāvataṃsocitamatikṣudramityarthaḥ | putrapremṇā svanandanasya tasminmayūre pakṣapātadarśanāt, svaputraviṣayeṇa vātsalyena vā; iyaṃ khalu snehasya śailī, yattatparigrahe'pi tadvatpakṣapāta iti bhāvaḥ | kuvalayadalakṣepi vikasitāruṇadalakesarapariveṣabhāsuravikasitendīvarānukāri, athavā svadhāraṇadaśāyāṃ pūrvāvasthitāvataṃsakuvalayanirāsi | karṇe śravaṇaśikhare | karoti nidadhāti | dhautāpāṅgaṃ bālbhyātirekādatyantasavidhasaṃcāriṇaḥ svato dhavalamapāṅgaṃ mṛgāṅkakiraṇavāridhārābhirdhāvalyoddīpanāt kṣālitaṃ yasya | pāvakeḥ hutavahasutasya, tanmukhasaṃbhṛtatvāt | paścāt puṣpābhiṣekānantaram | adrigrahaṇagurubhiḥ devagiriguhāpraveśaprabhūtapratidhvanivahalaiḥ | nartayethāḥ tvadgarjitabhavaṇe praharṣaparavaśasya tasya nṛttamavaśyaṃbhāvi, tadānīṃ tatprayojakatvānnṛttācāryatvaṃ tava bhavatītyarthaḥ | atrodāttamalaṃkāraḥ |