Meghaduta p198

p198

atha dṛṣṭivyāpārānantaraṃ tatra kimapi strīratnaṃ pratyakṣīkariṣyasītyāha—tanvīti | tanvī na tu tanutarā | anena nātisthūlā nātikṛśeti vyajyate, 'atidīrghā bhṛśaṃ hrasvā atisthūlā bhṛśaṃ kṛśā | atigaurī bhṛśaṃ kālī paṅgetā varjitāḥ striyaḥ ' iti sāmudrokteḥ | śyāmā kuvalayadalaśyāmavarṇā | śikharadaśanā 'pakvadāḍimabījābhaṃ māṇikyaṃ śikharaṃ viduḥ ' iti halāyudhaḥ | śikharākhyamāṇikyaviśeṣavat snigdhadhavalāruṇadantītyarthaḥ, 'ślakṣṇaiḥ snigdhaiḥ sitairdantaiḥ śobhanatvaṃ ca gacchati' iti sāmudrokteḥ | pakvabimbādharoṣṭhī pariṇatabimbikāphalasadṛśo'dharoṣṭho yasyāḥ, snigdhāruṇakomalādharetyarthaḥ; 'oṣṭhau ca nirvraṇau snigdhau nātisthūlau na romaśau | raktau bimbaphalākārau dhanaputrasukhapradau ||' iti sāmudrokteḥ | madhyekṣāmā madhyapradeśe tanutarā | 'amūrdhamastakātsvāṃgādakāme' ityaluk | cakitahariṇīprekṣaṇā kenacitkāraṇena bhītāyā mṛgyāstatkālataralataramugdhasnigdhāsitadīrghavipulaprekṣaṇamiva prekṣaṇaṃ yasyāḥ | nimnanābhiḥ gambhīranābhirandhrā | śroṇībhārāt nitambagauravākrāntatvāt | alasagamanā mandagatiḥ | stokanamrā īṣannamitā | stanābhyāṃ vṛttottuṅgapīnābhyām, 'snigdhakeśī viśālākṣī nimnanābhiḥ sumadhyamā | sumukhī suprabhā nārī