Meghaduta p225

p225

ādyetyādi | ādye tatprathame| baddhā tadanuguṇenākāreṇa grathitā| virahadivase viyogahetubhūte divase| śikhādāma dhammillabhūṣaṇabhūtāṃ navakusumamālikām| hitvā na punarapanīya, tadratena kautukena saha tṛṇavaddūratastyaktvetyarthaḥ| śāpasyānte varṣaparipūraṇena śāpasyāvasāne jāte| vigalitaśucā viśeṣeṇāpunarudbhavāya galitā naṣṭā śuk duḥkhaṃ yasya tena ; vigalitaśuceti, upari īdṛśānāṃ pramādānāṃ parihāreṇa matipūrvaṃ pravartanāpriyāvirahaduḥkhasya na kadācidapi saṃbhāvaneti bhāvaḥ| udveṣṭanīyāṃ udveṣṭayituṃ śithilagranthibandhīkartuṃ yogyām, yathāpuramatyudārabandhanāya| sparśakliṣṭāṃ kusumadāmakomaleṣvaṅgeṣu āsakte kaṇṭakavatpracaṇḍatodavedanāsaṃpādakena tasyāḥ sparśena mlānīkṛtām | ayamitanakhena akalpitatvātsvecchāvivṛddhakaruruheṇa | asakṛt bahuśaḥ, punaḥ punaḥ patanāt | sārayantīṃ parato'pasārayantīm | gaṇḍābhogāt kapolasthalāt | kaṭhinaviṣamāṃ karkaśāmucāvacāṃ ca | ayaṃ ca sparśakliṣṭātve hetuḥ, sparśakliṣṭātvaṃ cāpasāraṇe | ekaveṇīm ekajaṭātmakakeśabandhanaviśeṣarūpāṃ veṇīm | kareṇa na tu aṅgulībhiḥ | anena snigdhāsitabahulabarvaradīrghasūkṣmamṛdulānāṃ bhinnāgrāṇāṃ ca keśānāṃ veṇyākāreṇa saṃdaṣṭatayā ghanībhūya bhārāyamāṇatvātkarakamalenaiva yatnato'pasāraṇīyatvam , na punaratidurbalairaṅgulidalaiḥ śakyāpasāratvamiti dyotyate | atra parivṛttiḥ, kāvyaliṅgam, svabhāvoktiścālaṃkāraḥ |