Meghaduta p250

p250

athaitadvacanānantaraṃ tasyāḥ pravṛttimāha— ityākhyāta ityādi | iti anena prakāreṇa nijakarṇarasāyanāyamānamannāmasaṃkīrtanapuraḥsaraṃ kathita ityarthaḥ | 'vānaro'haṃ mahābhāge dūto rāmasya dhīmataḥ | rāmanāmāṅkitaṃ cedaṃ paśya devyaṅgulīyakam ||' ityādivādinam , pavanatanayaṃ paitṛkabalāvalepatṛṇīkṛtadurlaṅghyalaṅkādurgaṃ svasamīpamāgataṃ hanūmantam | maithilītyanena, na kevalaṃ sīradhvajasyaiva, kiṃtu mithilābhavānāmatītānāmāgāmināṃ ca rājarṣīṇāmatipavitreṇa nijacaritreṇa pāvanī alaṃkārabhūtā ceti dhvanyate | maithilīva vīkṣyetyanena, yathā devī sītā vātātmajaṃ harṣavismayasnehabahumānaviśvāsotkaṇṭhāśavalitahṛdayamavalokitavatī, tathā tvāṃ maddehinīti vyajyate | upamānena duṣkara kāryaśaktatvam, mitrakāryeṣvanirvedaḥ, bandhujanānurāgaḥ, viśuddhaśāstrodrāsitapratibhāprasaratvam, vijitendriyatvaṃ ca meghasya, nijacaritraniṣkalaṅkatvam, mahābhijanatvam, strīratnatvaṃ ca nāyikāyāḥ prakāśyate | unmukhī unnamitavadanā | utkaṇṭhocchvasitahṛdayā madvārtāśravaṇautsukyavikasitahṛdayā | ucchvasitaṃ pūrvasaṃkocavirahādullasitam, 'suggīassa vi hiaaṃ rāivasuṃkaapaḍimujjhaṇāsantaddhaṃ | agaṇiadahamuhadappaṃ ṇivvūḍhabharaṃ va takkhaṇaṃ ūsasiaṃ ||' 'pūrvāparādhabhītasya kāmasyocchvasitaṃ manaḥ' itivat | saṃbhāvya 'kalyāṇī bata gātheyaṃ laukikī pratibhāti me | eti jīvantamānando naraṃ varṣaśatādapi ||' ityādibhiḥ priyavacanairarghyādibhiśca saṃpūjya | saṃbhāvya caivetyevakāreṇa, tasyā harṣasaṃbhrame'pyupacārāvadhānaṃ dhvanyate | asmāt utkāducanāt | param anantaraṃ vakṣyamāṇaṃ madīyaṃ saṃdeśam | avahitā ekāgracittā | saumyeti, śāntātmanastava darśane ko nāma nādriyata