Meghaduta p268

p268

māṃ ya evaṃ pratihatopāyāntararastvadāliṅganatṛṣitaḥ, taṃ mām| ākāśapraṇihitabhujam alakṣyameva gagane pramodasarabhasaprasāritabāhuyugam, 'ka nīlakaṇṭha vrajasītyalakṣavāgasatyakaṇṭhārpitabāhubandhanā' itivat| ataśca labdhāyāḥ āśleṣodyoge nidrābhaṅgādapūrṇamanorathasyaiva prabodhaḥ prakāśyate; anyathā lakṣaśūnyatvoktyanupapatteḥ| nirdayāśleṣahetoḥ smaraśarasaṃjvaritamadaṅganirvāpaṇasudhāyamānadṛḍhatarāliṅgananimittam| labdhāyāḥ pramādaprabhraṃśitāyā iva ratnamālāyāḥ punarupalabdhāyāḥ| te mayeti, virahaparitaptayorāvayoḥ parasparasamāgame yā nirvṛtiḥ, tāṃ bhagavānaparṇājānireva jānātīti dyotyate| kathamapīti, nayanajaladravodrekanidrāvitanidrāmudratayā svapnadarśanasyāpi kādācitkatvam, jhaṭiti vinaśvaratvaṃ ca dhvanyate| svapnasaṃdarśaneṣu svapnāvasthopapāditeṣu samyagdarśaneṣu| samyagiti, sādṛśyasyāpūrṇatvāt, ālekhyadarśanasya viddatatvācca, svapne tu na tathā, darśanasukhaṃ tāvatsamagramupalabhyata iti dyotyate| bahuvacanena viṣayāntaracintābhāvānmanasaḥ, sātatyavāsitāyā: svapnonmeṣapramoṣayostaṭita iva tasyāḥ kṣaṇe kṣaṇe dṛṣṭatvaṃ naṣṭatvaṃ ca, tataśca svasya vāraṃ vāraṃ vyākulatvam, tena ca draṣṭṛṇāmatikaruṇārdratājanakatvaṃ ca dyotyate| bahuśa ityanenāpyayamarthaḥ samarthyate| paśyantīnāṃ na tu dṛṣṭavatīnām| anena darśanasya nairantaryaṃ prakāśyate| sthalīdevatānāṃ girivanasthalyabhimāninīnāṃ devatānām| muktāsthūlāḥ karuṇarasavilīnahṛdayatayā jhaṭityavaśameva vigalanāt sthūlāḥ pṛthavaḥ| muktāphalavatsthūlā ityanena sāhacaryādvalatvaṃ vṛttatvaṃ ca labhyate| tarukisalayeṣviti| tāsāṃ taruśikhareṣvavasthānāt kisalayānāṃ ca