Meghaduta p283

p283

atha kathitasya saṃdeśasya viśvāsyatāsiddhaye kimapyavigītaṃ cihmapi priyasuhṛdā dattamityāha— bhūyaścetyādi | bhūyaśca evaṃ saṃdeśamuktvā punarapīti cakāraḥ pūrvoktasamuccaye | śayane na tūyānavihārādau | anena vijane vāsamandire madvitīyā haṃsatūlikātalpagateti sakhībhirapyaviditasya dvābhyāmeva jñātatvaṃ dyotyate | kaṇṭhalagnā daḍhatarabhujalatābandhena mālatīmālikeva kaṇṭhe suśliṣṭā | anena suratāvasānasādaniḥsahairaṅgaiḥ saṃdaṣṭatvaṃ sūcyate | purā parasparasamāgamasukhena rasamayeṣviva divaseṣvatikrānteṣu; kadāciditi śeṣaḥ | me niratiśayaguṇagaṇavaśīkṛtatayā tvadekarasasya me ityarthaḥ | kimapi nidrāṃ gatvā 'dhettuṃ muṃcai aṃgaṃ roaṇṇaṃto vaḷlapekkhiuṃ digghaṭṭiṃ | vighaḍanti bhuāraā asuraammi vīsāmo' ityuktanītyā nirvinne rāgarājye pravartamāne'pi ratikhedasādavaśeneṣannidrāṃ prāpyetyarthaḥ| sasvaraṃ rudatī adṛṣṭapūrvamadīyapraṇayāparādhadarśanapracaṇḍakhaṇḍanoddaṇḍamanyusaṃbhāra-vivaśatayā muktakaṇṭhaṃ praruditetyarthaḥ| viprabuddhā vyākulaṃ prabuddhā, asītyanvayaḥ| sāntarhāsaṃ prabodhānantarameva premakāṣṭhāpratiṣṭhitanija-hṛdayātiśaṅkānuguṇonmeṣeṇa svapnadarśanena svasyāḥ pratāritatvamavagamya samullasitamandasmitamiti kathanakriyāviśeṣaṇam| asakṛt pṛcchate tvatkṣobhadarśanakampitahṛdayatayā kimidamamṛtahāsini kathaya kathayeti saśapathaṃ punaḥ punaranuyuñjānāya| cakāraḥ prabodhena kathanaṃ samuccinoti| kitava vañcaka| anena svapna iti ṛjudhiyo me pratibhāti; kitavena tvayā tu sākṣādeva tathā samācaritaṃ na veti daivaṃ jānātīti tasyāḥ praṇayakopānuvṛttiḥ premātiśaṅkāmaugdhyaṃ ca dhvanyate| ramayan āliṅganādibhirupacaran| kāmapi ramayan dṛṣṭa ityanena āvegājjhaṭiti prabodhena nāyikāntarasya viśeṣānālocanam, tataśca dṛṣṭa iti darśanameva kṛtam, na tu tadanantarabhāvi caraṇatāḍanādi prayuktamityanutāpo vyajyate| tvaṃ mayeti, tvameva mayaiva svapne'pyevaṃ dṛśyasa ityataḥ kimaruṃtudaṃ mameti pratīyate| iti kathitaṃ cetyanvayaḥ ||