Meghaduta p307

p307

'kacadhāryaṃ dehadhāryaṃ paridheyaṃ vilepanam | caturdhā bhūṣaṇaṃ prāhuḥ strīṇāmanyatra daiśikam ||' iti rasākare | tadevaitadāha— vāsa iti | yasyāmalakāyām | citraṃ nānāvarṇaṃ vāso vasanam | paridheyamaṇḍanametat | nayanayoḥ | vibhramāṇāmādeśā upadeśe dakṣam | anena vibhramadvārā madhuno maṇḍanatvamanusaṃdheyam | tacca maṇḍanādivadehadhārye'ntarbhāvyam | madhu madyam | kisalayaiḥ pallavaiḥ saha puṣpodbhedam, ubhayaṃ cetyarthaḥ | idaṃ tu kacadhāryam | bhūṣaṇānāṃ vikalpāniśeṣān | dehadhāryametat | tathā caraṇakamalayornyāsasya samarpaṇasya yogyam | rajyate'neneti rāgo rañjakadravyam | lākṣaiva rāgastaṃ lākṣārāgaṃ ca | cakāro'ṅgarāgādiṃvilepanamaṇḍanopalakṣaṇārthaḥ | sakalaṃ sarvam | caturvidhamapītyarthaḥ | abalāmaṇḍanaṃ yoṣitprasādhanajātam | ekaḥ kalpavṛkṣa eva | sūte janayati, na tu nānāsādhanasaṃpādanaprayāsa ityarthaḥ || 'etasmānmām' iti ślokānantaram