Gita Govinda 25.9.2
Śrutirañjanī 25.9.2
- Language
- Sanskrit
25.9.2
alaṅkaraṇopaveśasya prāthamyamavagantavyam | evaṃprakāreṇa jagādetyanvayaḥ | alikuleti || he priya he śrīkṛṣṇa, alikulasya bhramarasamūhasya¹ bhañjanaṃ² tiraskārakaṃ tato'pi atinīlavarṇamityarthaḥ | tvadadharacumbanena tvatrādharacumbanena lambhitaṃ prāpitaṃ kajjalaṃ kālimāñjanaikadeśo vā yasmāt tādṛśaṃ madīyanayanacumbanena tvadadhare lagnaikadeśamityarthaḥ; etādṛśam | añjanakaṃ karma, ratināyakasya ratipateḥ, sāyakānāṃ dṛṣṭirūpaviśikhānāṃ, mocana prayogaḥ yasmāt tādṛśe locane madīyanayane, ujjvalaya prakāśaya, vidhehītyarthaḥ | netre punarañjanaṃ kurviti tātparyam | 'kajjala ujjvalaye'ti kvacitpāṭhaḥ | tadā lambhitaṃ gamitaṃ kajjalaṃ yasmāditi locanaviśeṣaṇatvena yojyam | evaṃ nijagādetyanvayaḥ | nayanakuṅgeti | he śrīkṛṣṇa manasijasya kāmadevasya yaḥ pāśaḥ yuvanikaramanobandhanarajjuyantraviśeṣaḥ, tasya vilāso vibhramaḥ, tasya dhare pāśakalpa ityarthaḥ | subhage manohare nayanekuraṅgāviva nayanakuraṅgau, tadvadvati cañcale ityarthaḥ | taraṅgavat taraṅgaḥ, gatiparamparā, tasya vikāsasya vibhavasya nirodhakaṃ, nirodhakaṃ yat śrutimaṇḍalaṃ karṇapradeśaḥ tasmin netrayoḥ apāṅgaparyantagamananirodhakakarṇayugala ityarthaḥ³ | anena nayanayorākarṇāntaviśālatā sūcitā | kuṇḍale karṇābharaṇe viniveśaya vidhehi | evaṃ nijagādetyanvayaḥ |
Linked texts (1)
- Gītagovinda — Jayadeva, Sanskrit