Gita Govinda 11
Commentary of Mānāṅka 11
- Language
- Sanskrit
11.2
he daivata iṣṭadeva| he vaidyakṛtya vaidyānāṃ kṛtyaṃ kāryaṃ yasmin sa tathā tasya sambodhanam| athavā| "daivataṃ devavaidyayoḥ"| tasya saṃbodhanam, he dhanvantare he upendra śrīkṛṣṇa vajrādapi dāruṇo'si| niṣṭhuro'si| yato vimuktabādhāṃ rādhāṃ na kuruṣe| kimbhūtām| smarāturām| smareṇa kandarpeṇa āturāṃ pīḍitām| kimbhūtām| tvadaṅgasaṅgāmṛtamātrasādhyām| tava aṅgaṃ śarīraṃ tasya saṅgaḥ sa eva amṛtam| tanmātreṇa sādhyāṃ rakṣaṇīyām| vṛttamapi upendravajrā|
kandarpaityādi |
11.3
aho āścaryam | asyā rādhikāyāścetaḥ cittaṃ cirakālaṃ saṃbhrāmyati | samyak bhramati | kāsu | candanacandramaḥkamalinīcintāsu candanaṃ ca candramāśca kamalinī ca tāsāṃ cintā smaraṇaṃ satataṃ, tāsu | kimbhūtāyāḥ | kandarpajvara-saṃjvarākulatanoḥ kandarpasya jvaraḥ tena saṃjvarastāpaḥ tenākulā vyākulā tanuryasyāḥ sā tathā tasyāḥ | yadyevaṃ tarhi kathaṃ na mriyata ityāha | kintu klāntivaśena klānivaśena kṣīṇā kathaṃ kathamapi atikaṣṭena prāṇiti jīvati | kiṃ kurvatī rahasi sthitā | ekaṃ tvāmeva prāṇavallabhaṃ dhyāyantī | kimbhūtam | śītalataram atiśayena śītalam |
kṣaṇamapītyādi |
11.4
yayā rādhikayā purā pūrvakāle kṣaṇamapi kṣaṇamātramapi tava viraho viśleṣaḥ| na sehe na soḍhaḥ| kimbhūtayā| nayananimīlanakhinnayā| nayanayornimīlanaṃ nimeṣaḥ tena khinnayā| idānīmasau rādhikā kathaṃ śvasiti prāṇadhāraṇaṃ kathaṃ karoti| kiṃ kṛtvā| ciraviraheṇa rasālaśākhāṃ cūtaśākhāṃ vilokya|
kimbhūtām| puṣpitāgrām| puṣpitamagraṃ yasyāḥ sā tathā tām| ¹vṛttamapi puṣpitāgrā|
11.5
kaṃsaṃ dveṣṭīti kaṃsadviṭ tasya kaṃsadviṣo bāhurbhavataḥ śreyāṃsi śubhāni tanotu vistārayatu| kimbhūto bāhuḥ| govardhanaṃ vibhrat dhārayan| kiṃ kṛtvā| uddhṛtya| kasmāt| vṛṣṭivyākulagokulāvanavaśāt prakupitendraprayuktapracaṇḍavṛṣṭayā vyākulaṃ yadgokulaṃ tasyāvanaṃ rakṣaṇaṃ tasya vaśāt| kimbhūtasya kaṃsadviṣaḥ| gopatanoḥ gopasyeva tanuryasya sa tasya| kimbhūto bāhuḥ| garveṇaiva tadarpitādharataṭī tasyāḥ sindūraṃ tasya mudrā tayā aṅkitaḥ cihnitaḥ vallavānāṃ gopānāṃ vallabhābhiraṅganābhiḥ adhikānandāt ciraṃ cumbitaḥ|
iti śrīgītagovindaṭīkāyāṃ snigdhamādhavo nāma caturthaḥ sargaḥ|
uttaragītārthaṃ ślokena sūcayati| ¹ahamihetyādi—
Linked texts (1)
- Gītagovinda — Jayadeva, Sanskrit