Gita Govinda 20.2

20.2

he viparītakāriṇi | viparītaṃ pratikūlaṃ kartuṃ śīlaṃ svabhāvo yasyāḥ sā tasyāḥ saṃbodhane he viparītakāriṇi rādhe | viparītakāritvaṃ 9kathaṃ tvayā jñātam | yadyasmātkāraṇāt tasmin priye śrīkṛṣṇe snigdhe snehaṃ kurvati sati tvaṃ paruṣāsi niṣṭhurabhāṣiṇyasi | tathā ca tasmin praṇamati namaskurvati sati tvaṃ stabdhāsi| anamrāsi | mūkībhūtāsi | tathā ca yadyasmāttasmin rāgiṇi prītiṃ kurvati sati tvaṃ dveṣasthāsi aprītikāriṇyasi | yadyasmāt tasmin unmukhe sati tvaṃ vimukhatāṃ asaṃmukhatāṃ yātāsi gacchasi | tattasmāt kāraṇāt tava evaṃ yuktam | evaṃ katham | śrīkhaṇḍacarcā candanalepaḥ viṣaṃ viṣavatsantāpayati | tathā śītāṃśuścandramāḥ tapanaḥ sūryaḥ | tathāhi himaṃ śītalaṃ hutavahaḥ agnivat | krīḍāmudaḥ krīḍāsukhāni yātanāḥ vedanāḥ | sarveṣāṃ ucitapadopanyāsaḥ | etatsarvaṃ yuktameva | priye'nukūle tava viparītakāritvāt | 10mugdhaḥ mukundo yasmin saḥ | iti śrīgītagovindaṭīkāyāṃ kalahāntaritāvarṇane mugdhamukundo nāma navamaḥ sargaḥ |