Arjuna and the Hunter 1.14

1.14

vidhāyeti || śaṅkā saṃjātāsya śaṅkito'viśvastaḥ sanparitaḥ sarvatra svaparamaṇḍale parettarānātmīyān | avañcakāniti yāvat | yadvā parānitarayanti bhedenātmasātkurvantīti paretarān | tatkarotīti ṇyantātkarmaṇyaṇapratyayaḥ | rakṣantīti rakṣānrakṣakān | mantraguptisamarthānityarthaḥ | 'nandigrahi-' ityādinā pacādyac | vidhāya kṛtvā | niyujyetyarthaḥ | aśaṅkitākāramupaiti | svayamaviśvasto'pi viśvastavadeva vyavaharanparamukhenaiva parāṃnbhinattītyarthaḥ | na ca tāṃnarakṣānuprekṣate yena te'pi vikurvīrannityāha— kriyeti | kriyāpavargeṣu karmasamāptiṣvanujīvisātkṛtā bhṛtyādhīnāḥ kṛtāḥ | aparāvarttitayā dattā ityarthaḥ | 'deye trā ca' iti sātipratyayaḥ | saṃpado'sya rājñaḥ kṛtajñatāmupakāritvaṃ vadanti | prītidānairevāsya kṛtajñatvaṃ prakāśyate, na tu vāṅmātreṇetyarthaḥ | kṛtajñe rājanyanujīvino'nurajyante'nuraktāśca taṃ rakṣantīti bhāvaḥ || athopāyaprayogasya phalavattāṃ darśayati—