Sandesharasaka 5.114

5.114

pahiu bhaṇai pasayacchi turiu ki na vajjarihi,
ravi diṇasesu pahuttu paḍuṃjahi daya karihi
jāhi pahiya tuha maṃgalu hou puṇannavau
piyaha kahiya ika maḍila annu taha cūḍilau ||110||‡
taṇu dīunha sāsi sosijjai,
aṃsu jalohu ṇeya sosijjai
hiyau paḍikku paḍiu dīvaṃtari,
paḍiu pataṃgu ṇāi dīvaṃtari ||111||‡
uttarāyaṇu vaḍḍhahi divasa,
ṇisi dakkhiṇa ihu puvva ṇioiu
ducciyaṃ vaḍḍhahi jattha piya,
ihu tīya a virahāyaṇu hoiu ||112||‡
gayau divasu thiu sesu pahiya ! gamu milhiyai,
ṇisi atthami bolevi divasi puṇu calliyai
biṃbāhari diṇabiṃba junha gosihi balai;
rayaṇi toi jāihaum̐ kajji haum̐ āvalai
jai na rahahi iṇi ṭhāi pahiya ! icchahi gayaṇu,
cūḍillau khaḍahaḍau piyaha gāhāi bhagu ||113||‡
phalu virahaggi pavāsi tua,
pāia anhihi jāṃi piyaha bhaṇu
ciru jīvaṃtau laddha varu,
huau saṃvacchara tullau ikku diṇu