Setubandha 1.65_2.1

1.65_2.1

aha pecchaï rahu-taṇao caḍulaṃ dosa-saa-dukkha-boleavvaṃ
amaa-rasa-sāra-garuaṃ kajjārambhassa jovvaṇaṃ va samuddaṃ
gaaṇassa va paḍivimbaṃ dharaṇīa va ṇiggamaṃ disāṇa va ṇilaaṃ
bhuaṇassa va maṇi-taḍimaṃ palaassa va sāvasesa-jala-vicchaḍḍaṃ
bhamirubbhaḍa-kallolaṃ thora-karāhaa-disā-muhotthaa-salilaṃ
sāsaa-maeṇa bahuso khohijjantaṃ disā-gaeṇa va sasiṇā
apphuṇṇa-vidduma-vaṇe guppanta-paḍitthire salila-kallole
mandara-gūḍha-ppahare ajja vi saṃkhāa-lohie vva vahantam
muhala-ghaṇa-vippaïṇṇaṃ jala-ṇivahaṃ bharia-saala-ṇaha-mahi-vivaraṃ
ṇaï-muha-palhatthantaṃ appāṇa-viṇiggaaṃ jasaṃ va piantaṃ
joṇhāe vva miaṅkaṃ kittīa va suurisaṃ pahāe vva raviṃ
selaṃ mahā-ṇaīa va sirīa cira-ṇiggaāi vi amuccantaṃ
kālantara-jīa-haraṃ gaoṇiattanta-pavaṇa-ghaṭṭijjantaṃ
sallaṃ va deha-laggaṃ viaḍaṃ vaḍavā-muhāṇalaṃ vahamāṇam
dhua-vaṇa-rāi-kara-alaṃ malaa-mahinda-tthaṇora-sollaṇa-suhiaṃ
velāliṅgaṇa-mukkaṃ chiviosariehi velavantaṃ va mahiṃ
ṭhāṇe vi ṭhii-pahuttaṃ palae mahi-maṇḍalammi vi amāantaṃ
paṇaanta-vāmaṇa-taṇuṃ kamanta-deha-bhara-bharia-loaṃ va hariṃ
dīsantaṃ ahirāmaṃ suvvantaṃ pi aviiṇha-soavva-guṇaṃ
sukaassa va pariṇāmaṃ uahujjantaṃ pi sāsaa-suha-pphalaaṃ
ukkhaa-dumaṃ va selaṃ hima-haa-kamalāaraṃ va lacchi-vimukkaṃ
pīa-maïraṃ va casaaṃ bahula-paosaṃ va muddha-canda-virahiaṃ
ṇipphaṇṇa-suhāloaṃ vimala-jalabbhantara-ṭṭhiaṃ vahamāṇaṃ
dara-kaḍḍhiaṃ va raïṇā karāvalambia-karaṃ raaṇa-saṃghāaṃ
mahaṇāāsa-vimukkaṃ ucchittāmaa-visaṅkhalāṇala-ṇivahaṃ
vāsui-muha-ṇīsandaṃ vaḍavā-muha-kuhara-puñjiaṃ vahamāṇaṃ