Setubandha 1.65_2.2

1.65_2.2

dhīraṃ va jala-samūhaṃ timi-ṇivahaṃ miva sapakkha-pavvaa-loaṃ
ṇaï-sotte vva taraṅge raaṇāi va garua-guṇa-saāi vahantaṃ
pāāloara-gahire mahi-païrikka-viaḍe ṇaha-ṇirālambe
tellokke vva mahumahaṃ appāṇa ccia gaāgaāi karentaṃ
ahilīa paramuhīhiṃ chiviosariehi aṇusaa-vilolāhiṃ
aṇuṇijjamāṇa-maggaṃ vevanta-ṇiatta-patthiāhi ṇaīhiṃ
jīa-garuīhi ajja vi icchā-pajjatta-suha-rasāhi maentaṃ
dhaṇa-riddhīa sirīa a saliluppaṇṇāi vāruṇīa a lolaṃ
caḍulaṃ pi thiīa thiraṃ tiasukkhitta-raaṇaṃ pi sārabbhahiaṃ
mahiaṃ pi aṇoluggaṃ asāu-salilaṃ pi amaa-rasa-ṇīsandaṃ
pajjatta-raaṇa-gabbhe ṇaha-aru-palhattha-canda-ara-pārohe
uarabbhantara-sele suravaï-ḍimba-ṇihie ṇihi vva vahantaṃ
pariambhiaṃ uvagae bolīṇammi a ṇiatta-caḍula-sahāvaṃ
ṇava-jovvaṇe vva kāmaṃ daïa-samāgama-suhammi candujjoe
dara-phuḍia-sippi-saṃpuḍa-paloṭṭa-saṅkha-muha-bharia-muttā-ṇiaraṃ
mārua-dūrucchālia-jala-bhariaddha-vaha-paḍiṇiatta-jalaharaṃ
maragaa-maṇi-ppahāhaa-hariāanta-jaraḍha-ppavāla-kisalaaṃ
sura-gaa-gandhuddhāia-kari-maarāsaṇṇa-diṇṇa-meha-muha-vaḍaṃ
maṇivālaaṃ tīra-laā-hara-ppahohāsia-ramma-ṇivālaaṃ
ghaṇa-vāriaṃ velāliṅgaṇeṇa caḍulaṃ mahi-laṅghaṇa-vāriaṃ
sasi-maūha-paḍipellaṇa-pakkhubbhantaaṃ saṃcaranta-dharaṇīhara-pakkhubbhantaaṃ
dhīraaṃ saï muhala-ghaṇa-paa-vijjantaaṃ aṭṭhiaṃ ca valavāṇala-paavijjantaaṃ
ṇiaa-visāṇala-paavia-muttā-ṇiara-parigholamāṇa-visaharaṃ
mīṇa-gaï-magga-pāaḍa-seālomaïla-maṇi-silā-saṃghāaṃ
sari-saṃkulaṃ mahumaha-vallahāi lacchīa sāra-sarisaṃ kulaṃ
mahi-lāiaṃ ṇaï-muha-patthioṇiattia-velā-mahilāiaṃ