Andhra Mahabharatamu 4.2.204

4.2.204

సీ. తొడరిన హరునైన దోర్బలంబునఁ దన్ను | మిగులంగనీఁడను మేటి మాట,
యమరేంద్రు నర్ధాసనమునకు నైన న | ర్హుం డెంతయును నను రూఢిమాట,
జము నిల్లు సొచ్చిన జంతువు నైనను | గాచు నెమ్మెయి నను రాచమాట,
తనుఁ గోరి యూర్వశి దాన వచ్చిన నైన | లోలుండు గాఁడను మేలిమాట.
తే. శౌర్యవైభవ ప్రాభవ శౌచములకు | నొరులకైనఁ గైవారమై యుల్లసిల్లు
నొక్కరుని కివి యెల్లను నిక్కమట్టె ! | యెందుఁ గలుగునె యర్జును నీడువాఁడు ?