The Great Epic of the Bhārata dynasty 1.89.7

Bhāratabhāvadīpa 1.89.7

Language: Sanskrit

1.89.7

etadevāha | na jātviti | dhanena tapasā | tarhi tvameva kutohaṅkāraṃ kṛtavānityata āha | nāneti | jīvaloke'smin jīvā nānābhāvāḥ | pṛthaksvabhāvāḥ | keciddharmarucayaḥ | kecidviparītāḥ | yato daivādhīnāḥ | ata eva naṣṭā vṛthābhūtā ceṣṭā udyogaḥ adhikāro yogyatā ca yeṣāṃ te tathā | mūḍhānāṃ puṇye paṇḍitānāṃ pāpe ca pravṛttikaraṃ daivameva balavadityarthaḥ | evaṃ vidvāṃstattatprāpya na vihanyeta | tattatsukhaṃ duḥkhaṃ vā prāpya na vihanyeta harṣaviṣādābhyāmātmānaṃ na hiṃsyādityarthaḥ ||

Previous: 1.89.6
Next: 1.89.8
Up: 1.89

Linked texts (1)

Mahābhārata — Vyāsa, Sanskrit