The Great Epic of the Bhārata dynasty 6.26.1

6.26.1

arjune yuddhāduparate matputrā niṣkaṇṭakaṃ rājyaṃ prāpsyantītyāśāvantaṃ rājānaṃ prati sañjaya uvāca taṃ tatheti | tamarjunam | tathā “svajanaṃ hi kathaṃ hatvā sukhinaḥ syāma mādhava” ityuktaprakāreṇa kṛpayā snehena na tu dayayā paraduḥkhaprahāṇecchārūpayā | tasyāḥ paradaurbalyaniścayottarabhāvinyāḥ arjune “yadi vā no jayeyuḥ” iti svaparājayamāśaṅkamāne durbhaṇatvāt “yāneva hatvā na jijīviṣāmaḥ” iti snehātiśayasūcakavākyaśeṣavirodhācca | āviṣṭaṃ vyāptam | viṣīdantaṃ “sīdanti mama gātrāṇi” ityādinā uktarūpaṃ viṣādaṃ prāpnuvantam | idaṃ vakṣyamāṇaṃ vākyaṃ vacanīyam uvāca | madhusūdana iti duṣṭahantṛtvādevārjunaṃ nimittīkṛtya tvatputrānapi haniṣyatyeveti tvayā jayāśā na kāryeti bhāvaḥ ||