The Great Epic of the Bhārata dynasty 6.26.66

Bhāratabhāvadīpa 6.26.66

Language: Sanskrit

6.26.66

samanaskānāmindriyāṇāmanigrahe doṣa uktaḥ buddheraparyavasthāne ko doṣa ityata āha - nāstīti | ayuktasya śravaṇamananayoranāsaktasya buddhirbrahmātmaikyaniścayo nāsti | pramāṇaviṣayāsambhāvanāyāḥ prameyaviṣayāsambhāvanāyāścānirāsāt | tathā ayuktasyāsamāhitamanaso bhāvanā brahmākārāntaḥkaraṇavṛttipravāho nāsti | manasaścāñcalyena buddherapi cāñcalyāt | abhāvayato dhyānamakurvataḥ śāntiḥ sarvaduḥkhoparamaśca nāsti | cetaso'navasthitvena duḥkhāvaśyambhāvāt | aśāntasyānuparatasarvaduḥkhasya sukhaṃ pratyagadvayānandātmakaṃ kuto na kutaścit | duḥkhitvādeva ādyamayuktasyeti padaṃ yujir yoge ityasya rūpam | dvitīyaṃ yuja samādhau ityasya | tasmādbuddheḥ paryavasthānamāvaśyakam ||

Previous: 6.26.65
Next: 6.26.67
Up: 6.26

Linked texts (1)

Mahābhārata — Vyāsa, Sanskrit