The Great Epic of the Bhārata dynasty 6.27.40

Bhāratabhāvadīpa 6.27.40

Language: Sanskrit

6.27.40

kiñca - indriyāṇīti | ayamarthaḥ - indriyamanobuddhayo hi kāmenādhiṣṭhitā bāhyārthapravaṇā bhavanti | taiśca tathābhūtairayaṃ kāmo jñānaṃ cidākāśarūpamādarśatalaprakhyam | yatra yogino vyavahitaṃ viprakṛṣṭamatītamanāgataṃ vā paśyanti | yathoktamācāryaiḥ “viśvaṃ darpaṇadṛśyamānanagarītulyaṃ nijāntargatam | paśyantyātmani” iti nijāntargataṃ śarīrāntargatam ātmani hārdākāśākhye brahmaṇi tat malenādarśamivāvṛtya dehinaṃ dehābhimāninaṃ viśeṣeṇa mohayati | viśabdāddehābhimānaśūnyaṃ yoginamapi vyutthānāvasthāyāṃ kiñcinmohayatīti gamyata iti | akṣarayojanā spaṣṭā ||

Previous: 6.27.39
Next: 6.27.41
Up: 6.27

Linked texts (1)

Mahābhārata — Vyāsa, Sanskrit