The Great Epic of the Bhārata dynasty 6.28.11

6.28.11

nanu sādhvasādhvostrāṇavināśau kurvatastava vaiṣamyanairghṛṇye sto'taḥ kiṃ tavāsmadāditulyasya janmakarmasvarūpāṇāṃ cintanenetyāśaṅkyāha - ye yatheti | ye manuṣyāḥ māṃ sarvaśarīrasthaṃ yathā yena prakāreṇa śatrutvena mitratvena vā prapadyante prāpnuvanti tāṃstenaiva prakāreṇāhamapi bhajāmyanusarāmi | ye tu mama vartma bhaktidhyānapraṇidhānātmakamanuvartante tānmamātmabhūtāṃstathaiva sarvaśaḥ sarvaiḥ prakārairanuvarte'hamiti yojanā | tataśca madbimbabhūte prāṇijāte yathā yaḥ prītiṃ dveṣaṃ vā karoti tasminpratibimbabhūte'hamapi tathaiva prītiṃ dveṣaṃ ca karomi | bimbapūjāparibhavau pratibimbe eva saṅkrāmato'to na mama vaiṣamyanairghṛṇye staḥ | tasmāt śreyorthinā sarvasya kalyāṇāyaiva yatitavyamiti bhāvaḥ | bhāṣye tu ye yathā yena prakāreṇa yena prayojanena ārtā jijñāsavo'rthārthino jñānino vā pratipadyante tāṃstathaiva pīḍāparihāreṇa jñānadānena arthadānena mokṣadānena vā'nugṛhṇāmi | sarvathā te mamaiva vartmānuvartanta iti anyadevatābhaktā iti caitadvyācakṣyate ||