The Great Epic of the Bhārata dynasty 6.28.27

6.28.27

ito viśiṣṭaṃ yogāntaramāha - sarvāṇīti | indriyāṇāṃ karmāṇi śabdādigrahaṇāni prāṇakarmāṇyākuñcanaprasāraṇaśvāsapraśvāsādīni | apare yaginaḥ ātmani buddhau saṃyamaḥ sa eva yogo'gniśca tasmin jñānena dehendriyaprāṇamanovyatiriktātmajñānena dīpite prakāśite juhvati pravilāpayanti | indriyayogināṃ hi suptāviva prāṇo'nupasaṃhṛta evāste | tatsahacarasya manaso'nupasaṃhārāt | buddhiyogināṃ tu manaso'pyupasaṃhārāttadāyattasya prāṇasyāpyusaṃhāro bhavatīti viśeṣaḥ | eteṣāmapi buddhau boddhavyābhāvātpūrvavallīnāyāṃ samādhibuddhirasti, natvetairbuddheranyatvena nātmā jñāto nāpi tasminbuddhirupasaṃhṛtā | ataevaitānprakṛtyoktaṃ vāyavīye “bauddhā daśasahasrāṇi tiṣṭhanti vigatajvarāḥ” iti | bauddhā buddhau līnāḥ daśasahasrāṇi manvantarāṇītyanuṣaṅgāt ||