The Great Epic of the Bhārata dynasty 6.31.12

6.31.12

sātvikāḥ dharmajñānavairāgyaiśvaryādayaḥ, rājasāḥ lobhapravṛttyādayaḥ, tāmasāḥ nidrālasyādayaḥ, tānsarvānmatta eva rasatanmātrādirūpātsūtrātmano nirgatā iti viddhi | nanvevaṃ tava sarvajagadātmano vikāritvāpattyā kauṭasthyahānirityāśaṅkyāha - natvahaṃ teṣu te mayīti | yeṣvanṛtaḍarūpeṣvabādayaḥ protāsteṣu sūtrāvayavabhūteṣu rasādiṣvabādhitātmacinmātrarūpo ghaṭaśarāvodañcanādāviva mṛt nāsmi | anṛtasyāsya sattāsphuraṇe eva svakīye prayacchāmi natvanṛtātmā bhavāmītyarthaḥ | te tu mayyevādhyastā madananyāḥ yathā rajjvāmadhyastāḥ sarpādayo rajjvananyāḥ | “tadananyatvamārambhaṇaśabdādibhyaḥ” itinyāyāt | ananyatvaṃ vyatirekeṇābhāvaḥ | nakhalvananyatvamityabhedaṃ brūmaḥ kintu bhedaṃ niṣedhāmaḥ | kutaḥ ārambhaṇaśabdāt “vācārambhaṇaṃ vikāro nāmadheyam” iti vikārasya vāgālambanatvena svapnamāyendrajālikaviṣayasāmyaśruteḥ | nahyātmano vicitraprapañcātmatve te mayītyaṃśāvirodhe'pi natvahaṃ teṣvityaṃśe virodhaparihāro yujyate | kāryasya kāraṇātmakatvāvaśyambhāvāt | tasmādvivartavādāśrayeṇaiva brahmaṇo jagadupādānatvakūṭasthatve nirvahata iti sādhūktaṃ natvahaṃ teṣu te mayīti ||