The Great Epic of the Bhārata dynasty 6.42.75

6.42.75

kathamayaṃ tvayā dūrasthayorapi vāsudevārjunayoḥ saṃvādaḥ śruta ityata āha -- vyāsaprasādāditi | bhagavatā vyāsena divyaṃ cakṣuḥ śrotrādikaṃ mahyaṃ dattaṃ yenāhaṃ vyavahitaṃ viprakṛṣṭaṃ vā sarvaṃ karatalāmalakavadvijānāmi | ato vyāsaprasādādetacchāstraṃ paraṃ guhyaṃ gopyam ahaṃ śrutavān | yogaṃ ca ‘paśya me yogamaiśvaram’ iti pratijñāpūrvakaṃ pradarśitaṃ vaiśvarūpyaṃ tamapi dṛṣṭavāniti śeṣaḥ | svayaṃ kathayata ityukte “asya mahato bhūtasya niḥśvasitametadyadṛgvedaḥ” iti śruteḥ svaniḥśvasitaṃ vedaṃ śiṣyācāryaparamparayā kathayata ityāyāti tadarthaṃ sākṣātkathayata iti | sṛṣṭyādau brahmāṇaṃ pratīva idānīmarjunaṃ prati sākṣātkathayataḥ śrutavānahamityarthaḥ | tena bhagavadanugrahapātratayā brahmaṇā samatvaṃ svasya dyotyate | atra etadyogamityabhedenānvaye tu guhyapadāpekṣayā etadyogamiti punnapuṃsakaliṅgayorapi sāmānādhikaraṇyaṃ śakyaṃ ca yatkiñcidaśnatāpi kṣudupahantumityādāviva pūrvapravṛttaliṅgasaṃskāraprābalyāduttaratra bhinnaliṅgaviśeṣyalābhe'pi pūrvasaṃskāro na nivartata iti sāmānādhikaraṇyaṃ viliṅgayorapi vaktuṃ śakyamiti jñeyam ||