Karnabharananataka 2.10

2.10

śalyaḥ—tatastataḥ
karṇaḥ—tato jāmadagnyena samāśīrvacanaṃ dattvā pṛṣṭho'smi | ko bhavān kimarthamihāgata iti
śalyaḥ--tatastataḥ
karṇaḥ-tataḥ. bhagavan akhilānyastrāṇyupaśikṣitumicchāmītyuktavānasmi
śalyaḥ--tatastataḥ
karṇaḥ--tata ukto'haṃ bhagavatā brāhmaṇepūpadeśaṃ kariṣyāmi na kṣatriyāṇāmiti
śalyaḥ-asti khalu bhagavataḥ kṣatriyavaṃśyaiḥ pūrvavairam | tatastataḥ
karṇaḥ-tato nāhaṃ kṣatriya ityasyopadeśaṃ grahītumārabdhaṃ mayā
śalyaḥ-tatastataḥ
karṇaḥ-tataḥ katipayakālātikrame kadācitphalamūlasamitkuśakusumāharaṇāya gatavatā guruṇā sahānugato'smi
śalyaḥ--tatastataḥ
karṇaḥ-tataḥ sa gururvanabhramaṇapariśramānmadaṅke nidrāvaśamupagataḥ
śalyaḥ--tatastataḥ
karṇaḥ—tataḥ
kṛtte vajramukhena nāma kṛmiṇā daivānmamorudvaye
nidrācchedabhayādasahyata gurordhairyāttadā vedanā
utthāya kṣatajāplutaḥ sa sahasā roṣānaloddīpito
buddhvā māṃ ca śaśāpa kālaviphalānyastrāṇi te santviti