The Recognition of Śakuntalā 10.5.98

10.5.98

tasminsatyasya satyatvasaṃbhāvanā syāt | kiṃ ca nirūpaṇe'pi tatsādṛśyenaiva nirūpaṇaṃ na tattvena | kathaya kiṃnimittaṃ te saṃtāpaḥ | vikāraṃ khalu paramārthato'jñātvānārambhaḥ pratīkārasya | uktaṃ ca-“vyādhestattvaparijñānam” iti | darśanaṃ jñānam | balavānadhikaḥ khalu niścitaṃ me'bhiniveśa āgrahaḥ | akathana ityārtham | abhiniveśa iti grahe iti gaṇapāṭhāt | idānīmapyetadavasthāyāmapi | etādṛkpraśnasadbhāve satyapītyapiśabdārthaḥ | sahasākasmāt | agre'vaśyaṃ vakṣyamāṇatvātsahasetyuktiḥ | etayoriti sakhyoḥ | tatrāpi priyasakhyoḥ | rahasyabhedinyormadarthaṃ prāṇaparityāginyorityarthāntarasaṃkramitam | śaknomi nitarāṃ sāmastyena veditum | suṣṭheṣā bhaṇati | kimātmana ātaṅkamupekṣase | anena mamāpi praśne'bhiprāyo'stītyuktam | anudivasaṃ khalu parihīyase'ṅgaiḥ| pūrvaṃ svabhāvata eva kṛśādhunā tato'pīti bhāvaḥ | kevalaṃ lāvaṇyamayī chāyā tvāṃ na muñcati | tathā kārśyaṃ yathā pradhānaṃ lāvaṇyameva darśanayogyaṃ nāvayavā iti bhāvaḥ | avitathaṃ satyam | yastu priyaṃ vadati sa satyaṃ na vadati | iyaṃ priyaṃvadā satyavacanāpīti virodhaḥ | nāmnā tadābhāsaḥ | tayāṅgaiḥ parihīyasa ityuktam | ato rājāpi tadeva darśayati | tathāhīti | kṣāmeti | kṣāmakṣāmau kṛśatarau pūrvaṃ kṛśāvadhunā kṛśatarau kapolau yatra tadānanaṃ mukham | uraḥ kāṭhinyena muktau stanau yatra tat | idamapi kārśyādeva | pūrvaṃ klāntaḥ kṛśo'dhunā klāntataro madhyaḥ| aṃsau pūrvameva vinatāvadhunā prakāmamatyarthaṃ vinatau | chaviḥ pāṇḍureti virahakārśyādeva | śocyā śocanīyā ca priyadarśanā ca hṛdyadarśanā ceti virodhaḥ |