Shivattvaratnakara 103.1

103.1

iti śrīmadanādyanantasakalatattvottīrṇaṣaḍadhvopādānavindukāraṇacidambaraśaktisamanvitaparameśvaraprasādāsāditaśivādvaitavidyāviśārada
śrīmatkeladivamavarājendraviracitavedāgamāntargatavividhavidyātantrasārabhūtaṃ
śrīśivatattvaratnākare aṣṭamakallole
rudrākṣadhāraṇajapavidhirvarṇanaṃ nāma ṣaṣṭhastaraṅgaḥ
kīrttitaṃ bhasmanaścaiva rudrākṣāṇāṃ ca vaibhavam
taddhāraṇe ca niyamo japasyāpi vidhistathā
pradhānāṅgāni medhāyā etānyuktāni sāmpratam
śivapūjāvidhiṃ svāmin ! brūhi me karuṇārṇava !
putra ! te mahitā buddhiryat pṛcchasi śivārcanam
śṛṇu tatkathayiṣyāmi yad jñātuṃ tvamihecchasi
yadeva guruṇā dattamiśraṃ liṅgaṃ vidhāritam
sajjikāsthāpitaṃ tattu bhaktiyuktaḥ prapūjayet
yastu saṃpūjayelliṅgaṃ nityaṃ tribhuvaneśituḥ
sa svarṇamokṣabhāgyasya nityaṃ bhavati bhājanam
indranīlamayaṃ liṅgaṃ viṣṇurarcayate sadā
viṣṇutvaṃ prāptavāṃstena sādbhutaikaṃ sanātanam
brahmā pūjayate nityaṃ liṅgaṃ caiva śilāmayam
tasya saṃpūjanāttena prāptaṃ brahmatvamuttamam
śakro'pi devarājendro liṅgaṃ maṇimayaṃ śubham
śaiva pūjayate nityaṃ tena śakratvamāptavān
liṅgamannamayaṃ nityamagniryajati bhāvitaḥ
agnitvaṃ prāptavāṃstena tejobhūtamaninditam