Shivattvaratnakara 103.10

103.10

sphaṭikaṃ nirmalaṃ liṅgaṃ varuṇo'rcayate sadā
tena tadvaruṇatvaṃ hi prāptaṃ buddhivalānvitam
vāyuḥ pūjayate bhaktyā liṅgaṃ pittalajaṃ śubham
vāyutvaṃ tena saṃprāptamanaupamyaguṇānvitam
liṅgaṃ hemamayaṃ pūtaṃ dhanado'rcayate sadā
tenāsau dhanado devo dhanadatvamavāptavān
tāmraliṅgaṃ sadākālaṃ bhaktyā devo divākaraḥ
yajate vidhivattena prāptaṃ sūryatvamuttamam
muktāphalamayaṃ liṅgaṃ somaḥ pūjayate sadā
tena somo'pi saṃprāptaḥ somatvaṃ satatojjvalam
viśve devā mahātmāno raupyaliṅgaṃ manoharam
yajante vidhivad bhaktyā tena viśvatvamāpnuyuḥ
vasavaḥ kāṃsyaliṅgaṃ tu pūjayanti vidhānataḥ
prāptavanto mahātmāno vasutvaṃ sumahodayam
aśvinau pārthivaṃ liṅgaṃ yajantau suvidhānataḥ
tena tāvaśvinau devau divyadehaṃ gatāvubhau
sarvalohamayaṃ liṅgaṃ yajante mātarassadā
prāpustāstena mātṛtvaṃ sarvalokeṣu durlabham