Shivattvaratnakara 103.70

103.70

evaṃ nānāvidhairbhāvairarcayitvopacārakaiḥ
iṣṭaliṅgaṃ prāṇaliṅgamekīkṛtya samarcayet
antargataṃ cedākāraṃ liṅgaṃ śivamayaṃ param
pūjayed bhavapuṣpairyat prāṇaliṅgārcanaṃ hi tat
antaḥ pavanasampṛṣṭasusūkṣmāmbaraśobhite
mūrdhanyacandravigalatsudhāsekātiśītale
baddhendriyanavadvāre bodhadīpe hṛdālaye
padmapīṭe samāsīnaṃ celliṅgaṃ 1) śivarūpakam
bhāvayitvā sadākālaṃ pūjayed bhāvaśuddhitaḥ
kṣamābhiṣekasalilaṃ viveko vastramucyate
satyamāvaraṇaṃ proktaṃ vairāgyaṃ puṣpamālikā
gandhakṣamādisampattirakṣatā nirahaṃkṛtiḥ
śraddhā dhūpo mahājñānaṃ jagadbhāsipradīpikā
bhrānti mūlaprapañcasya naivedyaṃ tannivedanam
maunaṃ ghaṇṭāparispandastāmbūlaṃ viṣayārpaṇam
viṣayabhrāntirāhityaṃ syāt pradakṣiṇakalpanā
buddhestadātmakatvaṃ tu namaskārakriyā matā
evaṃ vidhairbhāvapuṣṭairupacārairadūṣitaiḥ
pratyaṅmukhamanā bhūtvā pūjayelliṅgamāntaram
antaḥ kriyāratasyāsya prāṇaliṅgārcanakramaiḥ
śivātmadhyānasampattissamādhiriti kathyate
sarvatattvoparigataṃ saccidānandabhāsuram
svaprakāśamanirdeśyamavāṅmānasagocaram
umākhyayā parāśaktyā dīpitaṃ citsvarūpayā
haṃsarūpaṃ parātmānaṃ so'haṃbhāvena cintayet
tadekatānatāsiddhissamādhiriti kathyate
pūjākoṭisamaṃ stotraṃ stotrakoṭisamo japaḥ
japakoṭisamaṃ dhyānaṃ dhyānakoṭirmanolayaḥ
evaṃ pūjāvidhiḥ prokto bāhyābhyantarastathā
ityanena prakāreṇa somaśekharabhūpatiḥ
abravīccennamāmnāyai śivapūjāvidhiṃ param
asmākaṃ ca vidhānena kṛtvā paṭṭābhiṣecanam
ayaṃ kumāro basavappanāyaka iti smṛtaḥ
pragalbhatāṃ bhajedyāvad rājyabhāravicāraṇe