Shivattvaratnakara 104.1

104.1

iti śrīmadanādyanantasakalatattvottīrṇaṣaḍadhvopādānavindukāraṇa
cidambaraśaktisamanvitaparameśvaraprasādāsāditaśivādvaitavidyāviśārada
śrīmatkeladībasavarājendraviracitavedāgamāntargatavividhavidyātantrasārabhūta
śrīśivatattvaratnākare aṣṭamakallole
śivapūjākramanirūpaṇaṃ nāma saptamastaraṅgaḥ
atha aṣṭamastaraṃgaḥ
kathitaṃ caritaṃ ramyaṃ somaśekharabhūpateḥ
śivapūjāvidhānaṃ ca durvijñeyaṃtaraṃ nṛṇām
etad dvayaṃ samākarṇya karṇadvayasudhopamam
santuṣṭahṛdayaḥ svāmin jāto'bhavamataḥ param
cennāmbikāyāścaritaṃ śrotumasti kutūhalam
tadākhyāhi tribhuvane vikhyātaguṇavāridhe!
kumāra ! caritaṃ tasyā amānuṣajanocitam
ākarṇaya samākarṇya vismayānandadāyakam
sāmādibhirupāyaiśca guṇaiṣṣaḍbhistriśaktibhiḥ
saptāṃgaissahite rājye sarvadaiva ca jāgrati
śivadharmānācarantī rājyaṃ nītyā cakāra sā
asmākaṃ sarvavidyāsu kārayantī pariśramam
vivāhamaṅgalamapi savaibhavamakārayat
kīrtyā dharmeṇa vikrāntyā rakṣantyā dharaṇīmimām
sarvasannāhayukteṣu sāmanteṣu kadācana
sīmopāntasamākrāntyai yatamāneṣu (dasyuṣu)
senāmukhyān sahabalaiḥ preṣayitvā balādhikān
nigṛhya tadvalaṃ sarvaṃ viracayya palāyitam
calādrisubhagān nāgānaśvān viśvātiśāyinaḥ
nānāvidhāni vastrāṇyatimūlyāni vidviṣām
ājahāra nijotkarṣaṃ khyāpayantī digantare
evaṃ kṣudrān samudvṛttān sāmantān vinigṛhyatī