Shivattvaratnakara 104.73

104.73

yena kena prakāreṇa śivabhaktasya jāyate
manastuṣṭistathā kuryāt pūjāsaiva mayoditā
saṃsārasāgare'gādhe duḥkhāvartaśatākule
majjatāṃ mānavānāṃ vai pūjāmāheśvarasya nauḥ
evaṃ svarūpaṃ vijñāya mahimānaṃ phalaṃ tathā
liṅgajaṅgamayoḥ pūjāṃ kurvāṇā bhaktisaṃyutā
asmākametadakhilaṃ durvijñeyaṃ nyarūpayat
tataḥ paraṃ mayi premṇā karaṇīyaṃ samādiśat
uktaṃ tvaṃ nānyathā brūyāḥ kvāpi kāryaṃ na saṃtyaja
mā muñca madhurālāpaṃ na brūyā hṛdayaṃ śaṭhe
amārge na padaṃ kuryāḥ sveṣu bhedaṃ na kāraya
pāpaṃ vimuñca sukṛtaṃ kuru śambhoḥ padaṃ bhaja
bhaja bhūteṣu karuṇāṃ saṃśritān paripālaya
na nindāṃ racayānyeṣāṃ na svairamiha saṃcara
jaya kāmādikān doṣān jugupsāṃ ca bhave kuru
vyasane bhayamunmuñca jahīhi vibhave madam
saṃpradhāraya tattvāni bhāvayādvaitamāntaram
nātivartasva samayaṃ vedajñāṃśca samarcaya
svapnaṃ bhāvaya saṃsāraṃ kohamityanucintaya
haserahasanīyastvaṃ brūhi vākyamanuttamam
janastutipadaṃ jīveranāvṛttigatiṃ bhajeḥ
śivaṃ prasādya bahudhā saṃtatānandabhāgbhava
kadācidasumarthaṃ tvaṃ mā vismārṣīriti svayam
udīrya vidyāssakalā nānābhedānnirūpya me
tathāpyupadiśāśeṣamityājñāpya ca māṃ prati
viyuktā prāṇanāthena somaśekharabhūbhujā
punastaṃ mārgamāṇeva tatpadaṃ yātumaihata
sālokyādīnyatikramya catvāryapi padāni ca
svayaṃ śivapadenaiṃkyaṃ prāpyānandamavindata
tadanantaramapyasmadvaṃśajānāṃ mahībhṛtām
prācīnānāṃ cariteṣu śauryādiṣu guṇeṣu ca
ekamaṃśaṃ sahasrāntaranuvartāmahe vayam
kvāhaṃ kva ca narāḥ pūrve putredaṃ saṃpradhāraya
ātmapraśaṃsanaṃ sadbhirnakartavyaṃ kadācana