Shivattvaratnakara 104.56

104.56

vastraṃ śītāpanodārthaṃ yo dadyācchivayogine
sa sarvabhogasaṃyukto labhate brahmaṇaḥ padam
yāvattadvastratantūnāṃ parisaṅkhyā ca yāvatī
tāvadvarṣasahasrāṇi rudraloke mahīyate
chatraṃ copānahaṃ yastu cāmaravyajanāni ca
dadyālliṅgārcakāyāsāvaindraṃ padamavāpnuyāt
dhanaṃ dadyādyathāśakti yo mahāśivayogine
sa dhaneśatvamāpnoti sarvabhogasamanvitaḥ
kārayitvā gṛhaṃ samyak sarvopakaraṇānvitam
liṅgāṅgasaṃgine dadyādyassa śaivaṃ padaṃ vrajet
sakṛlliṅgārcake datvā bhūmiṃ gocarmamātrakīm
bhūlokādhipatirbhūtvā śivena saha modate
sakṛlliṅgārcake datvā dhenuṃ bahupayodharām
rudraloke sa vasati yāvadromāṇi tatpaśoḥ
phalaṃ mūlaṃ ca bhaktāya śākāni vividhāni ca
bhaktipūrvaṃ tu yo dadyāt sa yāti paramāṃ gatim
yadyadātmahitaṃ loke tattad dravyamavañcayan
śivaliṅgārcake dadyāttena tuṣyāmi pārvati!
śivayogī gṛhe yasya bhikṣāṃ gṛhṇāti satkṛtaḥ
kulaṃ tārayate tena sapta sapta ca sapta ca
yastāmrapātraṃ sukṛtaṃ pradadyācchivayogine
suvarṇapātradānasya phalaṃ prāpnoti mānavaḥ
raupyaṃ sauvarṇapātraṃ vā nivedya śivayogine
koṭikoṭiṃ ca kalpānāṃ śivaloke mahīyate
kalaśaṃ karkarīṃ vāpi vastrapūtāmbupūritam
pradadyācchivabhaktebhyo tasya puṇyaphalaṃ śṛṇu
śuddhasphaṭikasaṃkāśairvimānaissārvakāmikaiḥ
saṃprāpya śāṅkarapuraṃ koṭivarṣaṃ pramodate
suśītalena toyena śivabhaktaṃ pipāsitam
tarpayitvā śaivaloke varṣakoṭiṃ pramodate
naivedyaṃ purato nyastaṃ darśanāt svīkṛtaṃ mayā
rasān bhaktasya jihvāgrādaśnāmi kamalodbhava!
śivasya nityatṛptasya kiṃ nāma kriyate janaiḥ?
yatkṛtaṃ śivabhaktānāṃ tena prīto bhavecchivaḥ