Shivattvaratnakara 105.128

105.128

balaṃ ca gaganādvāyoḥ sparśaṃ ca sparśanendriyam
utkṣepaṇamapakṣepākuñcane gamanaṃ tathā
prasāraṇamitīmāni pañcakarmāṇi rūkṣatā
agnestu locanaṃ rūpaṃ pittaṃ pākaṃ prakāśitā
amarṣaṃ taikṣṇyamūṣmāṇamojastejaśca śūratām
medhādīni tathādatte jalāttu rasanaṃ rasam
śauryaṃ svedaṃ dravaṃ snehaṃ gātrādimṛdutāmapi
bhūmerghāṇendriyaṃ gandhaṃ sthairyaṃ dhairyaṃ ca gauravam
śmaśrukeśanakhān dantānasthyādyaṃ yacca karkaśam
gudaliṅgāntare cakramādhārākhyaṃ caturdalam
paramassahajastadvadānando vīrapūrvakaḥ
yogānandaśca tasya syādaiśānyādidale phalam
asti kuṇḍalinī brahmaśaktirādhārapaṅkake
ā brahmarandhrasṛjutāṃ nīteyamamṛtapradā
svādhiṣṭhānaṃ liṅgamūle ṣaṭpatraṃ cakramasti ca
pūrvādiṣu daleṣvāhuḥ phalānyetānyapi kramāt
praśrayaḥ krūratā garyo nāśo mūrchā tataḥ param
avajñā syādaviśvāsaḥ kāmaśakteridaṃ gṛham
nābhau daśadalaṃ cakraṃ maṇipūrakasaṃjñakam
suṣuptiratra tṛṣṇā syādīrṣyā piśunatā tathā
lajjā bhayaṃ ghṛṇā mohaḥ kaṣāyo'tha viṣāditā
kramāt pūrvādipatreṣu syād bhānubhavanaṃ ca tat
hṛdaye'nāhataṃ cakraṃ śivasya praṇavākṛteḥ
pūjāsthānaṃ tadicchanti dalairdvādaśabhiryutam
laulyaṃ praṇāśaṃ kāpaṭyaṃ vitarko'pyanutāpitā
āśā prakāśaścintā ca samīhā samatā tathā
krameṇa dambho vaikalyaṃ viveko'haṅkṛtistathā
phalānyetāni pūrvādidalānyasyātmano jaguḥ
kaṇṭhe'sti bhāratīsthānaṃ viśuddhiṣoḍaśacchadam
tatra praṇava udgītho huṃ phaṭ vauṣaṭ vaṣaṭ svadhā
svāhā namo'mṛtaṃ saptasvarāṣṣaḍjādayo viṣam
iti pūrvādipatreṣu phalānyātmani ṣoḍaśa
lalanākhyaṃ ghaṇṭikāyāṃ cakraṃ dvādaśapatrakam
mado mānastathā snehaśśoko medaśca kṣubdhatā