Shivattvaratnakara 105.162

105.162

aratissaṃbhramormiśśraddhā toṣo'parādhitā
phalāni lalanācakre pūrvādiṣu daleṣviha
bhrūmadhyai 1) tridalaṃ cakramājñāsaṃjñāphalātmakam
āvirbhāvāssatvarajastamasāṃ kramaśo matāḥ
tato'pyasti manaścakraṃ ṣaḍdalaṃ tatphalāni tu
svapno rasopayogaśca ghrāṇaṃ rūpopalambhanam
sparśanaṃ śabdabodhaśca pūrvādiṣu duleṣviti
tato'pi ṣoḍaśadalaṃ somacakramitīritam
daleṣu ṣoḍaśasvasya kalāṣṣoḍaśa saṃsthitāḥ
kṛpā kṣamārjavaṃ dhairyaṃ vairāgyadhṛtisampadāḥ
hāsyaṃ romāñcanilayo dhyānaṃ susthiratā tataḥ
gāmbhīryamudyamassatvamaudāryaikāgrate kramāt
phalānyuśanti jīvasya pūrvādidalasaṃhatau
cakre sahasrapatraṃ tu brahmarandhre sudhāmayam
tatsudhāsāradhārābhirabhivardhayate tanum
brahmāṇḍe ye padārthāssyuste śarīre vyavasthitāḥ
pātālaṃ bhūdharā lokāstathānye dvīpasāgarāḥ
ādityādigrahāssarve piṇḍamadhye vyavasthitāḥ
pādādadhastādatala pādordhvaṃ vitalaṃ tathā
jaṃghayossutalaṃ jñeyaṃ pratalaṃ jānunordvayoḥ
talātalamathorvostu guhyasthāne rasātalam
pātālaṃ kaṭisandhau tu pādādīn lakṣayed budhaḥ
bhūloko nābhimadhyai tu bhuvarloko hṛdi sthitaḥ
svarlokaḥ kaṇṭhadeśe tu maharlokaṃstu tāluke
janalokastadūrdhvaṃ tu tapoloko lalāṭake
satyalokāśśirasyevaṃ bhuvanāni caturdaśa
trikoṇe saṃsthito merudhaḥkoṇe tu mandaraḥ
kailāso dakṣiṇe koṇe vāmakoṇe himālayaḥ
niṣadhaścordhvabhāge ca dakṣiṇe gandhamādanaḥ
vindhyastu romarekhāyāṃ saptaite kulaparvatāḥ
asthiṣu vyāpto jambūrmedassthaḥ plakṣasaṃjñakaḥ
māṃse sthitaḥ kuśadvīpo krauñcadvīpassirāsu ca
tvaci syācchālmalīdvīpo gomedo romasamvaye
nakhasthaṃ puṣkaraṃ vindyāt sāgarāstadanantaram
kṣārodaśca tathā mūtre rase kṣīrodasāgaraḥ
dadhyarṇavaḥ śleṣmamadhye majjāyāṃ sarpirarṇavaḥ
rasodadhirvasānte ca śoṇite ca surodadhiḥ
svādūdo lambikāsthāne garbhodassamasāgaraḥ
nādacakre sthitassūryo vinducakre tu candramāḥ
netrayośca kujo jñeyo hṛdaye ca budhaḥ sthitaḥ
guhyasthāne guruṃ vindyācchukre śukrassamāścitaḥ
nābhisthāne sthito mando mukhānte rāhurāśritaḥ
nādasthāne sthitaḥ keturaśvinyādyāstrayastrayaḥ
vibhavaśca samākhyātā āpādatalamastakam
hṛdi sthāne sthito brahmā kaṇṭhe viṣṇussamāścitaḥ
bhrūmadhya saṃsthito rudrastadūrdhve ca svarassmṛtaḥ
sadāśivo lalāṭānte pañcaite bhūtanāyakāḥ