Shivattvaratnakara 105.43

105.43

aputro vā bhavet so'yamathavā mṛtaputrakaḥ
puṣpagandhaṃ bhavedreto yasya puṃsassaraktakam
tadapatyaṃ bhajed dīrghamāyurvarṣaśataṃ bhuvi
nīlavarṇaṃ bhavedretaścāthavā pītakarburam
tadapatyaṃ bhaved bhūmau patnīputravināśakṛt
bindūnāṃ pañcadaśakaṃ yonau praviśate yadi
tadapatyaṃ ca kaumāre vayasyeva mṛtiṃ bhajet
daśa dvādaśa vā yonau bindavo nipatanti cet
abde viṃśe'thavā triṃśe mṛtiṃ sa samavāpnuyāt
aṣṭau ṣaḍvāpi vīryasya bindavo yonisaṅgatāḥ
dīrghāyustadapatyaṃ syādārogyādivalānvitam
pumān vīrye'dhike strī vai raktādhikye prajāyate
ubhe same niṣeke tu kubjavāmanakādayaḥ
arkendujīvaśukrairnā sarvairvā svāntakodaye
bhaumadṛṣṭiyute vāpi puṃyogāḥ syurime matāḥ
lagnasthassutasaṃstho vā navame vā balī guruḥ
ṛtorvirāme snātāyāṃ yadyupacayasaṃsthaśśaśī bhavati
balinā guruṇā dṛṣṭo bhartrā saha saṅgamaśca tadā
rājapuruṣeṇa raviṇā viṭena bhaumena vīkṣite candre
saumyena capalamatinā bhṛguṇā kāntena rūpavatā
bhṛtyena sūryaputreṇāyātā strī samāyogam
svagṛhaṃ tyaktvā sarvaṃ gacchati veśyāpadaṃ yuvatiḥ
indurjalaṃ kujo'gnī raktajalamagnireva pittaṃ syāt
evaṃ rakte kṣubhite pittena rajaḥ pravartate strīṣu
evaṃ yadbhavati rajo garbhasya nimittameva kathitaṃ tat
nābhimūle sthitaṃ padmaṃ caturdalasamanvitam
tasmin sarvāṃśca dadhate garbhasaṃbhavakāraṇam
adhomukhaṃ sthitaṃ strīṇāṃ tadbālye kuḍmalīkṛtam
bālyāt paravayaḥprāptau kuḍmalaṃ vikasad bhavet
utphullakusumaṃ strīṣu svabhāvena sravedrajaḥ
snānasya divasādarvāk doṣaṃ vakṣyāmi saṅgame
prathame'hanyṛtau prāpte niṣiñcayati yo naraḥ
acirānmṛtyumāpnoti dvitīye strī mariṣyati
tṛtīye'hni niṣiktasya garbhasya maraṇaṃ bhavet
caturthe jāyate putrastvalpāyurdhanavarjitaḥ