Shivattvaratnakara 105.26

105.26

hṛtpadme pratibaddhāśca sarvā nāḍyassamantataḥ
tāsāṃ mukheṣu tatsūkṣmaṃ prāṇaḥ sthāpayate rasam
rasena tena tā nāḍīḥ prāṇaḥ pūrayate punaḥ
pratyarpayanti saṃpūrṇāstāśca dehaṃ samantataḥ
tatassa nāḍīmadhyasthaśśarīroṣmaṇā rasaḥ
pacyate yacca pānānnaṃ bhavetpākadvayaṃ tataḥ
carmaviṣṭhaṃ samantācca rudhiraṃ ca prajāyate
raktāllomāni māṃsaṃ ca keśāḥ snāyuśca māṃsataḥ
snāyossirāstathāsthīni nakhamajje'sthisaṃbhave
majjākaraṇadvaikalyācchuklaṃ ca prasavātmakam
iti dvādaśadhānnasya pariṇāmaḥ prakīrtitaḥ
annāccaiva tataśśuklaṃ śukrāddehasya saṃbhavaḥ
ṛtukāle yadā śuklaṃ nirdoṣaṃ yonisaṃsthitam
tadā tadvāyunā spṛṣṭaṃ kṣīraktenaikatāṃ vrajet
visargakāle śuklasya jīvaḥ karaṇasaṃyutaḥ
prītyā praviśate yoniṃ karmabhissvairniyojitaḥ
striyassaṃsargakāle tu yo dharmaṃ manasā smaret
tatputro dharmavān bhūyāditi śāstreṣu niścayaḥ
patnīsaṃsargakāle tu jārabuddhyā rameta yaḥ
tadgarbhajo bhujaṅgaḥ syāt paranārīparāyaṇaḥ
corabuddhiṃ hṛdi sthāpya svastrīsaṅgarato yadi
corastadgarbhajo bhūyāt khalo vā sa vijāyate
bahunātra kimuktena yadyanmanasi bhāvayet
tadgarbhajastadguṇavān jāyate nātra saṃśayaḥ
ṛtau puruṣanakṣatre yāmādūrdhvaṃ ramet striyam
ubhāvekamanaskau cejjāyate puruṣottamaḥ
ṛtau cet klīvanakṣatre saṃsargo jāyate yadā
tadgarbhajo bhavet klībassarvadharmabahiṣkṛtaḥ
strīnakṣatre ṛtau gacchennārīṃ svāṃ puruṣo yadi
tadgarbhajā bhavet kanyā yugmabhe yamalau bhuvi
yādṛśeneva bhāvena naraśśukraṃ visarjayet
tādṛśeneva bhāvena hyapatyaṃ jāyate nṛṇām
yacchuklaṃ pūtigandhi syāttatputro vyādhito bhavet
tiktagandhaṃ yadā śuklaṃ yacchuklaṃ māṃsagandhavat