Shivattvaratnakara 105.77

105.77

pañcarātreṇa kalalaṃ budbudākāratāṃ vrajet
budbudaṃ saptarātreṇa māṃsapeśī bhavet punaḥ
dvisaptāhādbhavetpeśī raktamāṃsacitā dṛḍhā
vījasyevāṃkurāḥ peśyāḥ pañcaviṃśatirātritaḥ
bhavanti māsamātreṇa pañcadhā jāyate punaḥ
grīvā śiraśca skandhaśca pṛṣṭhavaṃśastathottaram
pāṇipādaṃ tathā pārśva kaṭirgātraṃ tathaiva ca
māsadvayena sarvāṇi kramaśassaṃbhavanti hi
tribhirmāsaiḥ prajāyante sarvāṅgāṃkurasandhayaḥ
māsaiścaturbhigulyaḥ prajāyante tathā kramāt
mukhaṃ nāsā ca karṇau ca jāyante pañcabhiḥ punaḥ
dantapaṃktistathā guhyaṃ jāyante ca nakhāḥ punaḥ
karṇayorbhavati chidraṃ ṣaṇmāsābhyantareṇa tu
pāyurmeḍhramupasthaṃ ca nābhiścāpyupajāyate
sandhayo yeca gātreṣu jāyante māsasaptake
aṅgapratyaṅgasampūrṇaśśiraḥkeśasamanvitaḥ
vibhaktāvayavaḥ spaṣṭaḥ pumānmāsāṣṭakena tu
punargarbhaṃ punardhātrīmojastatra pradhāvati
aṣṭame māsyato garbho jātaḥ prāṇairviyujyate
hṛdi tiṣṭhati yacchuddhamīṣacchuklaṃ sapītakam
ojaśśarīraṃ tat khyātaṃ yannāśānnāśamṛcchati
māturāhāravīryeṇa ṣaḍvidhena rasena ca
nābhisūtranibaddhena vardhate sa dine dine
tataḥ smṛtiṃ bhajejjīvassaṃpūrṇo'smin śarīrake
sukhaṃ duḥkhaṃ vijānāti nidrāṃ svapnaṃ purākṛtam
pālyantaritahastābhyāṃ śrotrarandhre pidhāya saḥ
udvigno garbhasaṃbandhādāste garbhāśayānvitaḥ
mṛtaścāhaṃ punarjāto jātaścāhaṃ punarmṛtaḥ
nānāyonisahasrāṇi mayā dṛṣṭāni bhūyasā
adhunā jātamātro'haṃ prāptasaṃskāra eva ca
tattacchreyaḥ kariṣyāmi yena garbhe na saṃbhavaḥ
garbhasthaścintayatyevamahaṃ garbhādvinirgataḥ
adhyeṣyāmi śivajñānaṃ saṃsāravinivartakam
evaṃ garbhe suduḥkhena mahatā paripīḍitaḥ