Shivattvaratnakara 105.94

105.94

jīvaḥ karmavaśādāste mokṣopāyaṃ vicintayan
yathā girivarākrāntaḥ kaścid duḥkhena jīvati
lohakumbhe yathā nyastaḥ pacyate kaścidagninā
garbhakumbhe tathā kṣiptaḥ pacyate jāṭharāgninā
sūcībhirabhivarṇābhirnirbhinnasya nirantaram
yadduḥkhamupajāyeta tadgarbheḍaṣṭaguṇaṃ bhavet
navame daśame vāpi pravalaissūtimārutaiḥ
nissāryate bāṇa iva yantracchidreṇa satvaram
ityetadgarbhaduḥkhaṃ hi prāṇināṃ parikīrtitam
bāhyena vāyunā spṛṣṭo vismaratyātmanaḥ sthitim
garbhāt koṭiguṇaṃ duḥkhaṃ yoniyantraprapīḍanāt
saṃmūrcchā jāyate tasya jāyamānasya dehinaḥ
tilavat pīḍyamānasya yantreṇeva samantataḥ
yathaiva tāḍyamānasya yantramudgarakoṭibhiḥ
tathā niṣkrāmyamāṇasya pravalaissūtimārutaiḥ
jāyate sumahad duḥkhaṃ parimāṇamavindataḥ
evaṃ garbhāt prajātasya vapuṣo rūpamīryate
asthnāṃ ṣaṣṭyuttaraṃ dehe śatānāṃ tritayaṃ smṛtam
sthālaissaha catuṣṣaṣṭirdantā vai viṃśatirnakhāḥ
pāṇipādaśalākāśca teṣāṃ sthānacatuṣṭayam
pañcyaṅgulīnāṃ dve pārṣṇī gulpheṣu ca catuṣṭayam
catvāryaratnikāsthīni jaṅghayostāvadeva tu
dve dve jānukapolorūphalakāṃsasamudbhave
akṣatālvoṣṭhake śroṇīphalake ca vinirdiśet
bhagāstyekaṃ tathā pṛṣṭhe catvāriṃśacca pañca ca
grīvā pañcadaśāsthi syājjatrāvekaṃ tathā hanuḥ
tanmūle dve lalāṭākṣigaṇḍe nāsā ghanasthikā
pārśvakāḥ sthālakaissārdhamarbudaiśca dvisaptatiḥ
dvau śaṃkhakau kapālāni catvāri śirasastathā
urassaptadaśāsthīni puruṣasyāsthisaṃgrahaḥ
gandharūparasasparśaśabdāśca viṣayāḥ smṛtāḥ
nāsikā locanaṃ jihvā tvakchrotraṃ cendriyāṇi ca
hastau pāyurupasthaṃ ca jihvā pādau ca pañcakam
karmendriyāṇi jānīyānmanastatrobhayātmakam