Shivattvaratnakara 11.1

11.1

sarveśvaro nīlakaṇṭhaḥ kramaśoliṃgasaptakam
saptasvapi ca lokeṣu sthitāstaṃpūjya bhaktitaḥ
tattalliṃgaprasādena svābhīṣṭāni bhajanti hi
adhaḥ kaṭāhadārabhya bhūmyā sākaṃ pramāṇakam
paṃcāśatkoṭisaṃkhyākayojanānītiniścayaḥ
iti śrīśivatattvaratnākare dvitīyakallole
saptapātālalokasvarūpavarṇanaṃ nāma caturthastaraṃgaḥ
pātālādikabhūmyantalokabhedānnirūpitān
ākarṇya paramānandamavindaṃ karuṇānidhe!
yathā lokeṣu yuṣmākaṃ kīrtissarveṣu bhāsate
tathā buddhissusūkṣmāpi niṣpratyūhaṃ pravartate
dṛśyamenaṃ mahīlokaṃ sabhedaṃ sasvarūpakam
anugrahānmayi svāmin! sarvametannirūpaya
sādhu nandana! yatpṛṣṭaṃ tvayā sūkṣmadhiyā punaḥ
tasyottaraṃ bravīmyadya nigamāgamasammatam
koṭidvayaṃ tripaṃcāśallakṣāṇi ca tataḥ param
paṃcāśaccasahasrāṇi saptadvīpāssasāgarāḥ
tatohiraṇmayī bhūmirdaśakoṭipramāṇataḥ
devānāṃ krīḍanārthāya lokālokastataḥ param
parvatovalayākāro yojanāyutavistṛtaḥ
tasmādvāhyaṃ tamo ghoraṃ duṣprekṣyaṃ jīvavarjitam
paṃcatriṃśatsmṛtāḥ koṭyo lakṣāṇyekonaviṃśatiḥ
catvāriṃśatsahasrāṇi yojanāni pramāṇataḥ
saptasāgaramānastu garbhodastadanantaram
koṭiyojanamānastu kaṭāhassaṃvyavasthitaḥ
brahmāṇḍo'yaṃ kaṭāhena saṃyukto merumadhyataḥ
paṃcāśatkoṭayo jñeyā daśadikṣu samantataḥ
jaṃbūśākāhvayau dvīpau kuśakrauñcau ca śālmaliḥ
gomedaḥ puṣkaraśceti saptadvīpāḥ prakīrtitāḥ
ete dvīpāssamudraistu saptasaptabhirādṛtāḥ
lakṣayojanavistāro jambūdvīpaḥ prakīrtitaḥ
sūryabimbasamākārastāvat kṣārārṇavāvṛtaḥ
jambūdvīpād dviguṇataḥ śākadvīpassamantataḥ
tāvatā kṣīratoyena samudreṇa parīvṛtaḥ
kuśadvīpo dviguṇataḥ tatastatparitaḥ sthitaḥ
dadhitoyena paritaḥ tāvatāmbudhināvṛtaḥ
krauñcastādvaguṇasso'pi ghṛtatoyena saṃvṛtaḥ