Shivattvaratnakara 11.16

11.16

tatastu śālmalī dvīpo dviguṇastāvateva tu
ikṣusārasvarūpeṇa samudreṇa parīvṛtaḥ
gomedaḥ paritastasmād dviguṇastāvatā vṛtaḥ
surātoyena daityānāṃ mohakenārṇavena vā
puṣkarastu tato dvīpo dviguṇastāvatā vṛtaḥ
svādutoyena ramyeṇa samudreṇa samantataḥ
jambūdvīpassamastānāmeteṣāṃ madhyasaṃsthitaḥ
tasyāpi merurākhyāto madhye kanakaparvataḥ
caturaśītisāhasrayojanānyasya cocchrayaḥ
praviṣṭaṣṣoḍaśādhastād dvātriṃśanmūrdhni vistṛtaḥ
mūle ṣoḍaṣa sāhastro vistārastasyasarvataḥ
bhūpadmasyāsyaśailo'sau karṇikākāravat sthitaḥ
śarāvavat sthitatvācca dvātriṃśanmūrdhni vistṛtaḥ
haimīkṛto maheśasya śubhāṃgasparśanena ca
dattūrapuṣpasaṃkāśa ssarvadevahite rataḥ
nemayaḥ kaṭakākārā nirgatādīptimattarāḥ
paṃcaviṃśatisāhasrādupariṣṭādapikṣiteḥ
daśasāhasravistārāḥ pratyekaṃ caiva meva hi
trisahasrasamucchrāyā valayāstasya saṃsthitāḥ
nemiryā mastakopānte lokapālasamāśritā
cakravāṭīti tāmāhu ssarvaratnaprabhāvatīm
tasya cāṣṭasu śṛṃgeṣu puryo'ṣṭau samavasthitāḥ
prācyādiṣvindramukhyānāṃ nāmabhistāssamanvitāḥ
nāmnā'marāvatī pūrve purī śakrasya hemajā
tejovatī purī jñeyā vahneḥ kamaḷalohitā
purī saṃyamanī yāmyā dakṣiṇe'ñjanasannibhā
rakṣovatī nirṛtestu nagarī kṛṣṇalohitā
vāruṇyāṃ śuddhavatyuktā varuṇasyenduvatsitā
vāyavye gandhavatyuktā vāyormarakatātmikā
mahodayā kuberasya cottare sarvaratnajā