Shivattvaratnakara 12.56

12.56

tathā sahasraśikhare vidyādharapurāṣṭakam
ratnasopānasaṃyuktaṃ sarobhiścopaśobhitam
nadyo vimalapānīyāścitranīlotpalāntarāḥ
yatra sālavanaṃ divyaṃ tatrāste śaṃkaro'mbayā
pārijāte mahāśaile mahālakṣmīpuraṃ śubham
ramyaprāsādasaṃyuktaṃ ghaṇṭācāmarabhūṣitam
gandharvakinnarākīrṇa mapsarovṛttasaṃkulam
gaṇeśvaragaṇājuṣṭaṃ dhārmikāṇāṃ sudarśanam
tatra sā vasate devī nityaṃ yogaparāyaṇā
mahālakṣmīrmahādevī triśūlavaradhāriṇī
trinetrā sarvaśaktyaughai ssaṃvṛ 1)ttā sadasanmayī
supārśvasyottare bhāge sarasvatyāḥ purottamam
pāṃḍarasya gireḥ śṛṃge vicitradrumasaṃkule
gandharvāṇāṃ puraśataṃ divyastrībhissamanvitam
tatra nityaṃ madotsiktā narā nāryastathaiva ca
krīḍanti muditā nityaṃ vilāsairbhogatatparāḥ
aṃjanasya gireḥ śṛṃge nārīṇāṃ puramuttamam
vasanti tatrāpsaraso raṃbhādyā lalitālasāḥ
citrasenādayo yatra samāyāntyarthinassadā
anekāni purāṇi syuḥ kaumude devasattamāḥ
rudrāṇāṃ śāntamanasāmīśvarāsaktacetasām
teṣu rudrā mahāyogānmaheśaṃ samupāsate
piñjarasya gireḥ śṛṃge gaṇeśānāṃ puratrayam
nandīśvarasya kapile tatrāste vṛṣabhādhipaḥ