Shivattvaratnakara 18.81
Śivattvaratnākara 18.81
- Language
- Sanskrit
18.81
āpyāyayati śītāṃśuḥ prakāśālhādanena ca
sañcāro bhānuvattasya samākhyātaḥ purātanaiḥ
pūrṇe śatasahasre tu yojanānāṃ niśākarāt
nakṣatramaṇḍalaṃ kṛtsnamupariṣṭātprakāśate
dvilakṣe cottare rājan ! budho nakṣatramaṇḍalāt
budhassomasutaścātrigotraḥ pītāmbarāvṛtaḥ
caturmukhaḥ khaḍgacarmagadāvaradapāṇimān
vāyvagnidravyasambhūtau rathaścandrasutasya ca
piśaṃgasturagairyuktassomābhirvāyuvegibhiḥ
tāvatpramāṇamārge tu budhasyāpyuśanāsthitaḥ
śukraścaturbhuja śvetavarṇaśvetahayānanaḥ
bhṛgujo daṇḍakarakākṣamālābhayahastavān
sāvarūḍhassānukarṣo yukto bhūsambhavairhayaiḥ
sopāsaṃgapatākastu śukrasyāpi ratho mahān
ūrdhvaṃ dvilakṣacchukrasya bhūmiputrassudāruṇaḥ
bhūsuto raktavarṇaśca meṣavāhaścaturbhujaḥ
śaktiśūlagadākhaḍgairbharadvājakulodbhavaḥ
aṣṭāśvaḥ kāñcanaḥ śrīmān bhaumasyāpi ratho mahān
padmarāgāruṇairaśvaissaṃyukto vahnisambhavaiḥ
tāvatpramāṇādupari bhūputrādaṃgirāvaraḥ
gurussuvarṇasadṛśagātrasturagavāhanaḥ
daṇḍākṣasūtrakarakavaraśobhicaturbhujaḥ
aṣṭābhiḥ pāṇḍurābhiryukte vājibhiḥ kāñcane rathe
tiṣṭhaṃstiṣṭhati varṣe ca rāśau rāśau bṛhaspatiḥ
gurorūrdhvaṃ dvilakṣāttu yojanānāṃ ravessutaḥ
śanissūryasuto gṛdhravāho nīlāṃgakāśyapiḥ
caturbhujaścāpavāṇābhayahastollasatkaraḥ
ākāśasambhavai raśvaiśśabalaissyandanaṃ yutam
samāruhya śaniryāti mandāgāmī śanaiścaraḥ
bhūmernavatisāhasrādūrdhvaṃ tadrāhumaṇḍalam
svarbhānosturagā hyaṣṭau bhṛṃgābhā dhūsaro rathaḥ
sakṛdyuktāstu maitreya ! vahantyavirataṃ ratham
tathā keturathasyāśvā aṣṭau vai vātaraṃhasaḥ
18.81.p1
palāladhūmravarṇābhā lākṣārasannibhāruṇāḥ
apradakṣiṇā rāhoḥ ketoścāpi tathā gatiḥ
siṃhikātanayo rāhurapibaccāmṛtaṃ purā
śiraśchinno'pi na prāṇaistyakto'sau grahatāṃ gataḥ
mṛṣṭakāntarhito rāhussūryācandramasāvubhau
chādayatyuragākāro varadānātsvayambhuvaḥ
andhakāramayo rāhurmeghacchanna ivotthitaḥ
ācchādayati somākau parvakāle hyupasthite
tamomaye'sya tamaso raviraśmipalāyinaḥ
bhūcchāyā candrabimbaśca dve sthāne parikalpite
tatrāsthitassvayaṃ rāhurvaradānātsvayambhuvaḥ
vipradattahutāśena svairamāpyāyito bhavet
digdāholkāmahīkampatamoghūmarajāṃsi ca
kathayantyāgamaṃ rāhoḥ puraḥ parvaṇyupasthite
grahapañcakasaṃyogaṃ dṛṣṭvā tu grahaṇaṃ vadet
18.81.p2
yadi na syādbudhastatra na taṃ dṛṣṭvā grahaṃ vadet
Linked texts (5)
- Brahmāṇḍapurāṇa — Vyāsa, Sanskrit
- Brahmapurāṇa — Vyāsa, Sanskrit
- Garuḍapurāṇa — Vyāsa, Sanskrit
- Viṣṇupurāṇa (critical edition) — Sanskrit
- Śivatattvaratnākara — Basappa Nāyaka 1684, Sanskrit