Shivattvaratnakara 23.1

23.1

itiśrīmadanādyanantasakalatattvottīrṇaṣaḍadhvopādanabindukāraṇacidambaraśaktisamanvitaparameśvaraprasādāsāditāśivādvaitavidyāviśāradaśrīmatkeḷadibasavarājendraviracita vedāgamāntargatavividhavidyātantrasārabhūtaśivatattvaratnākare tṛtīyakallole śivalokādikaṭāhāntavarṇanaṃ nāma saptamastaraṃgaḥ
taraṃgaissaptabhiryukte kallole'smiṃstṛtīyake
granthānāṃ ṣaṭśatī pañcacatvāriṃśatsamanvitā
mahābhāratavārāhe kaurme skāndaṃ ca vaiṣṇavam
kumārī kāṇḍaśaivādi saṃgṛhyāyaṃ kṛto'bhavat
śrīmatsadguṇa somaśekharalasaccannāmbikāsūnunā
śrīdīkṣāgurucennavīrakarasañjātena labdhaśriyā
gaurībharturanugrahādvasavarājendreṇa klṛpte punaḥ
kallolaḥ paripūritaḥ kṛtivaretvasmiṃstṛtīyo'bhavat
śrīḥ
śrīḥ
śrīśivatattvaratnākare
caturthakallole
prathamastaraṃgaḥ
vīkṣyāsyaṃ harinīlakuṭṭimagataṃ mātuḥ payojabhramāt
hartuṃ vāñchati bimbitaṃ harimamuprekṣya drutaṃ vāñchati
vighneśānujabarhibhītivigaladvandho darādau śruye
saṃśliṣyānanacumbanodyatakare śambhuhaṃsanno'vatāt
bhagavan! viditāśeṣavedyajāta! 1)kṛpāmbudhe!
brahmāṇḍāntargatām̐llokānbodhaṃ tvatprasādataḥ
puṇyā tadāpagāvacca gambhīrā tatsthitābdhivat
tattatkalpatarurbhimassamaṃ sarvārthadāyinī
tatratya puṣpa surabhistatsudhāmadhuraṃ kramāt
tadvāyuveginī tadvatspaṣṭavarṇa vibhāginī
upaveśamayī vāṇī māmānandaṃ nayantyasau
kālāgnirudralokācca śivalokāntamīritaṃ
samastalokavistāre khaṇḍe bhāratanāmani
śrute'pi samprati nadīnadadeśādrimedinī
prapañcācchravaṇaṃ citramīhate madhu samprati
suta! praśastamaprākṣīḥ bruve tasyottaraṃ śṛṇu
bharaṇāttu prajānāṃ vai manurbharata ucyate
niruktavacanaścaivaṃ varṣaṃ tadbhārataṃ smṛtam
ita svargaśca mokṣaśca madhyamaścāpyatassmṛtaḥ
na khalvanyatra martyānāṃ bhūmau karmavidhissmṛtaḥ
tadidaṃ bhārataṃ varṣaṃ yasmin svāyambhuvādayaḥ
caturdaśaite manavaḥ prajāsargaṃ vitenire
dakṣiṇa yatsamudrasya himanāgasya cottaram
varṣaṃ tadbhārataṃ nāma yatraiṣā bhāratī prajā
bhāratasyāsya varṣasya nava bhedān śṛṇuṣva me
sahasrayojana mitān pratyekaṃ rājapuṅgava!