Shivattvaratnakara 23.13

23.13

indradvīpaḥ kaśeruśca tāmravarṇo gabhastimān
nāgadvīpastathā saumyo gāndharvastvatha vāruṇaḥ
ayantu navamasteṣāṃ kanyā 1)dvīpastu madhyagaḥ
sahasrayojanāyāmassa tu varṇaśrimānvitaḥ
asminmanvaṃtare te'ṣṭau dvīpāssagaranandanaiḥ
anveṣamāṇaisturagaṃ khātvā jalanidhīkṛtāḥ
sumālī hemamālī ca śambhuvarṇagiristathā
vaiḍūryo rajataścaiva maṇiśca maṇimānapi
evamaṣṭau mahāśailāssamudrāntarvyavasthitāḥ
maryādākārakaḥ kṣipto varṣāṇāṃ sagarātmajaiḥ
āyato yatkumārāto dvīpo'yaṃ dakṣiṇottaraḥ
sahasrayojanamitaḥ kanyakākhyo'tiśobhanaḥ
tatte varṣaṃ pravakṣyāmi yathāśrutamarindama!
mahendro malayassahyaśśuktimānṛkṣa eva ca
vindhyaśca pāriyātraśca saptaite kulaparvatāḥ
teṣāṃ sahasraśo rājan! parvatāstu samīpagāḥ
abhijñātāssāravanto vipulāścitrasānavaḥ
anye tattāparijñātā hrasvā hrasvopajīvinaḥ
āryā mlecchāśca kauravyāstairmiśrāḥ puruṣā vibho!
nadīḥ pibanti bahulā gaṃgāsindhusarasvatīḥ
godāvarīṃ narmadāñca bahudāñca sarasvatīm
śatadrumindubhāgāñca yamunāñca mahānadīm
dṛṣadvatīṃ vipāśāṃ ca vipāpmāṃ talavāllukām
nadīṃ vetravatīṃ caiva kṛṣṇaveṇīṃ ca nimnagām
irāvatīṃ viśastāṃ ca payoṣṇīṃ devikāmapi
vedasmṛtīṃ vetasinīṃ tridivāmikṣulāmikām