Shivattvaratnakara 25.44

25.44

svasthacitto vasettatra kṛtakṛtya ivātmavān
daṇḍo yatrāvinīteṣu satkāraśca kṛtātmasu
sadaiva tatra nivaseddharmaśīleṣu sādhuṣu
dhanikaḥ śrotriyo rājā nadī vaidyaśca pañcamaḥ
pañca yatra na vidyante na tatra divasaṃ vaset
kīkaṭeṣvapi deśeṣu yatra māheśvaro janaḥ
manāk prapanno nivaset kāśīkṣetrasamaṃ hi tat
yasmindeśe vasennityaṃ śivabhaktaḥ kṣamānvitaḥ
so pi deśo bhavetpūtaḥ kiṃ punastasya bāndhavāḥ
caṇḍālavāṭikāyāṃ vā śivabhaktaḥ sthito yadi
tacchreṇiśivalokasyāt tadgṛhaṃ śivamandiram
rudrādhyāyī vasedyatra grāme vā nagare'pi vā
na tatra śrutipāsādyā durbhikṣaṃ vyādhayo'pi vā
athāṣṭaṣaṣṭi kṣetrāṇi puṇyāni kathayāmi te
sālagrāmaṃ kurukṣetraṃ prayāgaṃ padmanābhakam
puṇḍarīkaṃ mādhavaṃ ca kāñcī ca puruṣottamam
vṛndāvanaṃ ca śrīraṅgaṃ vedapādanagastathā
dvārakā ca tathā'yodhyā sahyaparvata evaca
śrīpatiśca tathā putra ! naimiśaṃ kurujāṅgalam
siṃhāmalakraśailākhyamahobilamataḥparam
gāruḍaṃ caiva gopālaṃ kokākhyaṃ madhurākhyakam
vaiṣṇaveṣūttamaṃ kṣetraṃ trayoviṃśatisaṃjñakam
seturgokarṇavālmīkigayāraṇyaṃ gayā tathā
vṛddhācalaṃ cābhrasabhā vātāpikṣetramevaca
agastyabhāskarakṣetre'gastyanābhākhyamevaca
someśvaraśca bhīmeśaḥ kurukṣetrāruṇācale
japyeśvaraṃ kumbhaghoṇaṃ naimiśāraṇyameva ca
vemāraṇyaṃ kālahastīkamalācala evaca