Shivattvaratnakara 28.79

28.79

suvijānāti tattvena liṃganiṣṭhassahasa vai bhavet
niṣṭhāsu tatparo yogī haṃso vā paramo'pivā
jñātṛvijñeyayorekyāmavijānan dvijottama!
natyajedātmanassūtraṃ bāhyaṃ brahmavinirmitam
sisṛkṣureka evāgre samāsīnaśśivassvayam
sṛṣṭvā guṇamayīṃ māyāṃ sūtrarūpāmivākarot
tayā tadātmakaṃ viṣṇuṃ sṛṣṭvā pālaṃ divaukasām
svayaṃ brahmā bhavadrudro rudraścāsya kṣayāya saḥ
yajñātmakena hariṇā brahmātmani śive'vyaye
tatsūtramupavītatvādbrahmasūtramiti smṛtam
yajñena copavītatvādyajñasūtraṃ vidurbudhāḥ
tadājñayopavītatvādbrahmaṇo brahmasūtrakam
tāvallokāstrayo vedāstrayo devāstrayo'gnayaḥ
śivasṛṣṭāstrayo varṇāstrivṛtsūtraṃ samāśrayet
tadgranthimāśritastārastrimātro nādasaṃyutaḥ
tadgranthyagraṃ ca sāvitrī vedamātā śivājñayā
evaṃ dvādaśa daivataṃ brahmasūtraṃ dvijanmanām
tyakteṣaṇatrayo yogī hyātmānātmavivekavān
tyajenmāyātmakaṃ sūtraṃ nirmāyaḥ karmavarjitaḥ
iti karttavyatā loke brahmasūtradhṛto bhavet
tasya dvandveṣu saktissyātsaṃgo bandhāvahassmṛtaḥ
tasmātsaṃgavinirmuktyai kāryākāryavivekinā
nirāśiṣā nispṛheṇa tyājyaṃ sūtraṃ vijānatā
tyaktvānyathā cetpatati narake śāśvatīssamāḥ
yatnenopaniṣanmātraṃ paṭhennaiva vivādayet
vedāntānchāvayecchiṣyāndāntānsaṃgavivarjitaḥ
sadācārāṃśca saṃpṛṣṭo vadennānyatkadācana
varjayedarthaśāstrādi laukikāṃśca prayatnataḥ
caturthakāla āpanne bhikṣārthaṃ paryaṭedyatiḥ
tṛṇāmbuphalabhakṣo vā parṇamūlapayośanaḥ
eteṣāmekato yatra vartate yatiruttamaḥ
athavā karapātreṇa gomūtreṇa viśeṣataḥ
karapātre gṛhṇan sasa paryaṭenmaunato yatiḥ
prathamaṃ gṛhamāgatya nārāyaṇamanusmaret
bhikṣāṃ pragṛhya hastena praṇavena jalaṃ kṣipet
maunena bhikṣāṃ prāśnīyātkaraṃ na kṣālayettathā