Shivattvaratnakara 30.1

30.1

iti śrīśivatattvaratnākare caturthakallole varṇāśramasādhāraṇa
dharmātyāśramasvarūpanirūpaṇaṃ nāma ṣaṣṭhastaraṃgaḥ
atha saptamastaraṃgaḥ
varṇāśramāmāṃstadācāran śrutvā śrīmadudīritān
jñātārtho'smi guro! śrotumanyadasti kutūhalam
vihitasyānanuṣṭhāne niṣiddhakaraṇeṣu ca
prāyaścittārhatā nṛṇāmiti śrīmadbhirīritam
kasya vā karmaṇaḥ kiṃ vā prāyaścittamiti smṛtam
etanmahyaṃ samākhyāhi guro! mayi kṛpāvaśāt
prāyaścittamimaṃ vakṣye pāpānāmadhunā śṛṇu
brahmahā ca surāpī ca steyī ca gurutalpagaḥ
mahāpātakinastvete tatsaṃyogī ca pañcamaḥ
yastu saṃvatsaraṃ tvetaiśśayanāsanabhojanaiḥ
saṃvasetsaha taṃ vidyātpatitaṃ sarvakarmasu
ajñānādbrāhmaṇaṃ hatvā cīravāsā jaṭī bhavet
tasyaiva hataviprasya kapālamapidhārayet
tadabhāve muniśreṣṭha! kapālaṃ cānyadeva vā
tadvṛkṣyaṃ dhvajadaṇḍe tu dhṛtvā vanacaro bhavet
vanyāhāro bhavennityamekavāraṃ mitāśanaḥ
samyaksandhyāmupāsīta trikālaṃ snānamācaret
svādhyāyādhyāpanādīni varjayetsaṃsmareddharim
brahmacārī bhavennityaṃ gandhamālyādi varjayet
yadi vanyairna jīveta grāme bhikṣāṃ samācaret
śarāvapātradhārīsyād dvāristho viṣṇutatparaḥ
vadecca brahmahāsmīti saptāgārāṇi paryaṭet
dvādaśābdavrataṃ kuryādevaṃ hariparāyaṇaḥ
brahmahā śuddhimāpnoti karmārhaścaiva jāyate
vratamadhyai mṛgairvāpi corairvāpi nipātitaḥ
gonimittaṃ dvijārthaṃ vā prāṇānvāpi parityajet
yadvādadyād dvijendrebhyo gavāmayutamuttamam
eteṣvanyatamaṃ kṛtvā brahmahā śuddhi māpnuyāt
dīkṣitaṃ brāhmaṇaṃ hatvā dviguṇaṃ vratamācaret
dīkṣitaṃ kṣatriyaṃ hatvā cared brahmaṇo vratam
ācāryādivadhe caiva vratamuktaṃ caturguṇam
hatvā tu vipramātraṃ tu caretsaṃvatsaraṃ vratama