Shivattvaratnakara 30.63

30.63

ekavāre kṛte tvabdavrataṃ kṛtvā viśuddhyati
dinatraye gato vahnidagdhaśśudhyeta nānyathā
caṇḍālīṃ pulkasīṃ caiva snuṣāṃ ca bhaginīṃ tathā
mitrastriyaṃ śiṣyapatnīṃ yastu vai kāmato vrajet
brahmahatyāvrataṃ kuryātṣaḍabdaṃ munisattama !
akāmato vrajedyastu tryabdaṃ kṛchraṃ samācaret
mahāpātakiṃsaṃsargaprāyaścittaṃ tu kathyate
yasya yena bhavetsaṃgo brahmahādicaturṣvapi
tattad vrataṃ tu nirvartya śuddhimāpnotyasaṃśayaḥ
ajñānātpañcarātraṃ tu saṃgamebhiḥ karoti cet
kāyakṛchraṃ caretsamyaganyathā patito bhavet
dvādaśāhaṃ tu saṃsarge mahāsāntapanaṃ caret
saṃgaṃ kṛtvārdhamāsaṃ tu upavāsān daśācaret
parākaṃ māsasaṃsarge cāndraṃ māsatraye vratam
kṛtvā ṣaṇmāsasaṃgaṃ tu kuryāccāndrāyaṇatrayam
kiṃcittyūnābdasaṃge tu ṣaṇmāsaṃ vratamācaret
asya ca triguṇaṃ proktaṃ jñānātsaṃge yathākramam
grāmāraṇyakharoṣṭrābhirmṛgamīnāhimāhiṣīḥ
saṃkalīkaraṇaṃ proktamardhakṛchraṃ caredvaghe
āraṇyapakṣiṇo ye ca jalajā ye ca pakṣiṇaḥ
kṛmikīṭādighātaśca madyānugatabhojanam
phalekṣukusumasteyaṃ malinīkaraṇaṃ viduḥ
malinīkaraṇe caivamabdakṛchraṃ samācaret
ninditebhyo dhanādānaṃ vāṇijyaṃ śūdrasevanam
asatyabhāṣaṇaṃ caivamapātrīkaraṇaṃ viduḥ !
apātrīkaraṇe rājannabdakṛchraṃ samācaret
(brāhmaṇasya rujaḥ kuryānmadyāghrāṇaṃ tathaiva ca
jaihyaṃ sarvatra martyeṣu puruṣeṣu ca maithunam
jātibhraṃśakaraṃ proktamabdakṛcchraṃ samācaret )
maṇḍūkaṃ nakulaṃ kākaṃ varāhaṃ mūṣakaṃ tathā
mārjārajālikaśuno hatvā vai kṛkakuṭaṃ tathā
kṛchrārdhamācaredvidvan! trikṛchraṃ cāśvahā caret
taptakṛchraṃ kalivadhe parākaṃ govadhe smṛtam
yānaśayyāsanādyeṣu puṣpamālāphaleṣu ca
bhakṣyabhojyopahāre ca pañcagavyaṃ viśodhanam