Shivattvaratnakara 30.79

30.79

śuṣkakāṣṭhatṛṇānāṃ ca drumāṇāṃ ca guḍasya ca
carmavastrāmiṣāṇāṃ ca trirātraṃ syādabhojanam
ṭiṭṭibhaṃ cakravākaṃ ca haṃsaṃ kāraṇḍavaṃ tathā
ulūkaṃ sārasaṃ caiva kapotaṃ jālapāḍukam
śukaṃ cāṣaṃ balākaṃ ca śiśumāraṃ ca kacchapam
eteṣvanyatamaṃ hatvā dvādaśāhamabhojanam
prājāpatyavrataṃ kuryādretoviṇmūtrabhakṣaṇe
cāndrāyaṇatrayaṃ proktaṃ śūdrocchiṣṭasya bhojane
rajasvalāṃ ca caṇḍālāṃ mahāpātakinaṃ tathā
sūtikāṃ patitaṃ caivamucchiṣṭaṃ rajakādikam
spṛṣṭvā sacelaṃ snāyīta ghṛtasya prāśanaṃ tathā
gāyatrīṃ ca viśuddhātmā japeddaśaśataṃ tathā
eteṣvanyatamaṃ spṛṣṭvā bhuñjītājñānato yadi
trirātropoṣita 1) śśudhye pañcagavyaniṣevaṇam
dānayajñajapādīnāṃ bhojanaśrāddhayorapi
madhye śṛṇoti yadyeṣāṃ śabdaṃ kuryātkathaṃ dvijaḥ
udvamed bhuktamannaṃ ca snātvā copavasettataḥ
dvitīye'hani ghṛtaṃ prāśya śuddhimāpnoti paṇḍitāḥ
pāpānāmadhikaṃ pāpaṃ dvijadaivatanindanam
na dṛṣṭā niṣkṛtisteṣāṃ sarvaśāstreṣu sattamāḥ
abhakṣyabhakṣaṇe 2) caivamabhojyānāṃ ca bhojane
chardayitvā tadannaṃ tu pañcagavyaṃ pibettataḥ
etatte kathitaṃ sarvaṃ prāyaścittamidaṃ mayā
prāyaścittena pūtātmā mukto bhavati pātakaiḥ
atha sāntapanādīnāṃ kṛcchrāṇāṃ lakṣma kathyate
muṇḍastriṣavaṇasnāyī hyadhaśśāyī jitendriyaḥ
strīśūdrapatitaissādha varjayedapi bhāṣaṇam
pavitrāṇi japecchaktyā juhuyāccaiva śaktitaḥ
māṣānmasūramudgāṃśca parānnaṃ maithunaṃ tathā
3) kṣaurakṣaudrāśanānāṃ ca lavaṇasya phalasya ca
bhakṣaṇaṃ naiva kurvīta kṛchracāndrāyaṇādīṣu
śrāddhaṃ kuryād vratānte tu gohiraṇyādidakṣiṇām
āpohiṣṭhetisūktaṃ ca śuddhavatyaghamarṣaṇam
sarvatassvastimityaśca pāvamānyastathaivaca