Shivattvaratnakara 32.80

32.80

tāvubhau militau madhyamārge paramaharṣitau
rājā tasmai bahuvidhānupahārānakalpayat
tauryatrikaravākīrṇāssarvā mukharayandiśaḥ
sapauravargassabaḷassāmātyassaparicchadaḥ
basaveśvaramānīya nināya bhavanaṃ prati
sarvādhipatyaṃ datvā taṃ nijamantri pade nyadhāt
vāsareṣu prayāteṣu tataḥ katipayeṣu tu
bijjalākhyo mahīpālaḥ piśunoktivaśaṃvadaḥ
tatāna cittavikṣepānpratīpāneva bhūriśaḥ
ye'pyasya mahimotkarṣaprakāśāryābhavanparam
prakāśayeyussaṃgharṣānmuhuḥ śrīkhaṇḍasaurabham
sarvadā gururliṃgaśrījaṃgamānāmabhīpsitam
arpayitvaiva sakalāṃstarpayāmāsa tānmuhuḥ
mitrāṇāṃ darśiṃtānekacitrāṇāṃ sahavartinām
pramathānāṃ vīraśaivamatānuguṇatāṃ gatām
prakāśaṣaṭsthalīvidyāṃ narmaśikṣitadurmataḥ
saṃsthāpayannaśeṣeṇa śivadharmān kṣitāviha
caturviṃśativarṣāṇi bhaktisāmrājyamanvabhūt
ayaṃ nṛpaśśivadrohamagre viracayiṣyati
jagaddevamalladevanāmānau tasya nigrahe
baddhodyamau mamāvāsaḥ kāle'sminnocito bhavet
mitrasya bijjalakṣoṇīpaternaṣṭyā vipanmayā
ityālocya nijaṃ sthānaṃ gantumicchāṃ cakāra saḥ
tataḥ katipayaireva nijasthānaṃ gaṇaissaha
pratiṣṭhamānamaprākṣuḥ pariśiṣṭagaṇeśvarāḥ
deśaḥ ko vā'smadāvāsayogyassyāttaṃ vadasva naḥ
iti pṛṣṭo gaṇānvevaṃ jagāda basaveśvaraḥ
agre dharmā dhūsaratvaṃ prayāsyanti samantataḥ
utpātāśca bhaviṣyanti janānāṃ layasūcakāḥ
virūpākṣaprasādasya mahimnā bhuvi viśrutam
siṃhāsanaṃ narapate ruddhaviṣyati kiñcana
tadbhuktivyatyayādeva kramātsaṃkocameṣyati
anantaraṃ mahārāṣṭra mannāmnā khyātimethivān
mamānugrahapātraṃ ca bhaktaḥ kaścidudeṣyati
rāmeśvaraprasādena tadvaṃśyāśca pratikṣaṇam
aidheranbahurājyaśrībalakīrtiparākramaiḥ